23-anyos gipusil patay sa ilang tugkaran

CEBU, Philippines - Gipusil patay ang usa ka 23-anyos nga ulitawo samtang nag-estorya sa iyang higala sa gawas nga bahin sa iyang pinuy-anan diha sa sitio San Miguel barangay Uwak sa lungsod sa Asturias niadtong Huwebes sa alas 10:00 sa gabii.

Ang biktima mao si Roel Arguilles, 23, molupyo sa nahisgutang lugar samtang ang mamumuno nga wala mailhi nagsul-ob ug nagtabon og sinina sa iyang nawong.

Subay sa imbestigasyon sa kapulisan samtang nakig-estorya ang biktima sa iyang barkada nga si Jujie Ostia dihang kalit miabot ang mamumuno ug sa walay igong hinungdan kalit nga gipusil si Arguilles dapit sa tiyan usa ka higayun gamit ang wala matinong kalibre sa armas ug pagkahuman misakay sa motor paingon sa wala matumbok nga direksyon.

Ang kapulisan padayun pa sa ilang imbestigasyon pagtumbok sa suspek og sa motibo sa kremin og ingon man pagsikop niini aron pagtaral sa hukmanan. - Darrel Carumba ug Reggie Pajaron (BANAT NEWS)