Joavan wa motambong sa hearing

CEBU, Philippines - Si Municipal Trial Court in Cities Judge Mario Manayon sa Talisay gikatakdang mo-isyu og bench warrant batok sa sinagop ni Mayor Socrates Fernandez nga si Joavan tungod sa wala niini pagtunga sa pre-trial conference kagahapon sa buntag sa kasong grave threat nga gipasaka batok kaniya sa registered nurse nga si Vincent Castrodes.

Ang kampo lang ni Castrodes ug SPO1 Ricardo Balbutin ang mitambong sa pre-trial.

Si Piskal Floralil Lucero-Albert misugyot pinaagi sa mosyon kang Manayon nga moluwat og bench warrant batok kang Joavan aron pugson kini pagpatunga. Giaprobahan ni Manayon ang mosyon.

Si Castrodes nga nahinabi sa mga tigbalita kagahapon nagkanayon nga gi-wave ni Joavan ang iyang katungod sa pre-trial ug nalipay siya nga giaprobahan sa huwes ang bench warrant nga gisugyot sa public prosecutor.

Karong Septiyembre 23, 2010 sa buntag gikatakda ang hearing sa maong kaso.

Si Joavan nga nahinabi sa Banat News kagahapon nagkanayon nga wala siya makahibalo nga duna ba diay schedule sa pre-trial ug wala pa usab siya magka-estorya sa ang iyang abogado.

Matud niini nga atua siya sa Dumaguete tungod kay nag-atiman siya sa iyang negosyo.

Si Joavan midugang nga estoryahon dayon niya ang iyang abogado kabahin sa maong problema.

Si Talisay City Prosecutor Marshal Rubia nga nahinabi sa mga tigbalita mipasabot nga sa pre-trial hisgutan o sabotan sa duha ka habig kun unsay tukiong mga isyu ug ipresentar nga mga ebidensiya atol sa trial aron dili yagaw ang pagpahigayon sa hearing sa kaso.

Kahinumduman usab nga si Castrodes mibutyag nga dili siya makighusay kang Joavan ug buot niyang mapasaka ngadto sa Korte ang kaso nga iyang gipasaka batok sa sinagop sa mayor.

Ang maong kaso nagsugod sa dihang si Joavan ug Castrodes nagka-engkwentro sa trapiko diha sa barangay Bulacao, Talisay.

Si Joavan gipasanginlan ni Castrodes nga nanion ngadto kaniya og pistola apan ang maong pasangil gihimakak ni Joavan.   – BANAT NEWS