3 ka lungsod igo sa buhawi, alimpos

CEBU, Philippines - Tulo ka mga lungsod – usa sa amihanan ug duha sa habagatan -- sa lalawigan sa Sugbo naigo sa buhawi hinungdan sa pagkaguba sa mokabat 56 ka panimalay niadtong miaging gabii.

Sa lungsod sa Santander, 20 ka balay sa tulo ka barangay ang nakaangkon og kadaot tungod sa buhawi.

Sa lungsod sa Argao, 14 ka balay ang naapektohan sa alimpos diin duha niini ang wala na gyud mahitsura.

Sa isla sa Lipayran, lungsod sa Bantayan, 22 usab ka balay ang gihuyop sa buhawi.

Sa utlanan sa Santander ug Oslob, midahili ang yuta sa sitio Saging, barangay Luka mugna gihapon sa buhawi.

Santander

Sa Santander, ang mga barangay Poblacion, Pasil ug Looc ang naigo sa buhawi hinungdan nga nahagsa sa mga karsada ang mga bato ug sagbot tungod sa pag-awas sa duha ka sapa sa maong lugar.

Matud pa ni PO2 Edgardo Pacaña sa Santander Police Station sa dihang nahinabi sa Banat News nga mga alas 10 sa milabay’ng gabii namatikdan ang pagbunok sa ulan hangtod mikusog pag-ayo sa pagka-ala 1:30 sa kaadlawon ug maoy gituohan nga nakamugna sa grabeng pagbaha.

Si PO2 Pacaña wala maka-rekord nga dunay naangol o nakalas sa katalagman. Apan matud niya temporaryong mibakwit gikan sa ilang mga balay ang mga pamilya, ilabi na kadtong nagpuyo sa mga dili konkreto.

Argao

Sa Argao, ang barangay Talaga maoy naigo sa alimpos. Ang mga municipal social worker sa Argao mibanabana nga P550 mil ang danyos nga gibilin sa alimpos.

Apil sa naguba ang pinuy-anan ni Kapitan Florentino Ortega sa barangay Talaga ug naangol ang barangay health worker nga si Elizabeth Alonzo human mahugno ang ilang balay ug gibanlas sila sa dagat tungod sa kakusog sa baha dala sa alimpos.

Si Ortega sa dihang gikahinabi sa Banat News mibutyag nga samtang nagpadayon ang bunok sa ulan nakadungog sila og kusog nga lagubo sa gawas ug sa dihang ilang gisusi gipanglupad na sa hangin pataas ang mga butang.

Dugang pa ni Ortega nga milanat og tulo ka minutos ang pagkusokuso sa alimpos sa ilang balay apan milagrong wala malagpot ang imahen ni Señor Sto. Niño sa gawas apan ang imahen ni Birheng Maria nalagpot ug didto mitugpa sa trak de karga gibanabanang lima ngadto sa pito ka metros gikan sa ilang balay.

Matud pang Ortega nga daw gipugngan ni Birheng Maria ang trak nga dili malagpot ngadto sa ilang balay.

Samtang usa ka barangay tanod nga giilang si Jose dela Peña giingong nalagpot samtang nagbantay sa outpost sa sitio Baybayon sa Talaga, apan wala hinuoy grabeng kadaot nga naangkon.

Kadaghanan sa mga balay natangtang og mga atop ingon man bongbong tungod sa kakusog sa hangin ug ang mga pamilyang apektado kasamtangang gipahiluna sa shop sa kapitan diha sa maong lugar samtang wala pa maayo ang mga balay niini.

Bantayan

Sa isla sa Lipayran, Bantayan, naangol ang usa ka 8-anyos nga batang lalaki human natapsingan sa atop nga sin sa dihang milupad ang mga atop sa upat sa 22 ka balay nga naigo sa buhawi sa miaging gabii atol sa pagbunok sa kusog nga ulan sa sitio Mancabayao, barangay Lipayran, isla sa lungsod sa Bantayan.

Si Dolly Derecho, social worker sa Department of Social Welfare and Development (DSWD) nagkanayon nga ang bata nga si Jerecho Melendrez nasamad sa kilay nga natapsingan sa sin samtang naglakaw samtang namakwit sa ilang silingan.

Matud ni Derecho nga 22 ka balay ang naigo sa buhawi, upat niini naibot ang mga atop nga gibanlas paingon ngadto sa dagat, samtang ang 18 pulos nangaguba nga pulos light materials. Si Derecho niingon nga kagahapon sa udto mianha sa ilang buhatan ang mga biktima, ilang gipaniudto ug gipanghatagan nila og linatang sardinas samtang isunod usab nila ang pagpanghatag og kinilong bugas.

Matud pa niya nga walay nakalas nga kinabuhi sanglit ang mga tag-iya sa 22 ka balay nanghapa sa salog sa ilang balay sa dihang milupad ang mga sin sa atop.

Si Oscar Tabada, direktor sa PAGASA-Mactan mipasabot nga mas kusog ang alimpos kay sa buhawi.

Apan si Tabada nagkanayon nga angayang timan-an sa mga tawo ang timailhan sa buhawi ug alimpos nga mao ang pagsige og dugdog ug kilat.  – BANAT NEWS