Manghod ni Gwen gikiha sa Ombuds

CEBU, Philippines - Gipasakaan og pormal nga reklamo sa Office of the Ombudsman-Visayas ang manghod ni Gob. Gwendolyn Garcia nga si Bise Mayor Marlon Garcia sa Barili tungod sa dili maayong pamatasan nga gipakita niini.

Ang Visayan Federation of Corruption Prevention Unit (VFCPU) maoy mipasaka og kaso batok sa bise mayor tungod sa matud pa paglapas sa Code of Conduct and Ethical Standards for Public Officials and Employees.

Subay sa reklamo, si Bise Mayor Garcia maoy gitumbok nga hinungdan sa kagubot tali ni Mayor Teresito Mariñas ug sa konseho nga gipangulohan sa manghod sa gobernadora.

Sa gisukip nga reklamo sa maong grupo, gihisgutan niini ang gipakitang pagkaway respeto ni Marlon ngadto sa mayor ug sa legal opinion nga gipakanaog ni Department of Interior and Local government (DILG-7) Pedro Noval.

Kini may labot sa pag-realign sa konseho sa gahin nga giduso ni Mariñas pagpalit og CCTV camera nga gi-veto sa mayor apan na-override (napilde) sa konseho.

Gipasanginlan sa VFCPU ang bise mayor nga naghawodhawod sa Barili nga gihulagway nila nga dili maayong panig-ingnan sa mga lokal nga opisyal.

Nanawagan ang VFCPU sa Ombudsman og dinaliang aksiyon aron dili maapektuhan ang mga batakang serbisyo sa lungsod.

Gisukip usab sa reklamo ang tubag sa bise ngadto sa mayor diin nag-awhag hinuon sa mayor pagdangop sa korte o sa Provincial Legal Office o sa Hunta Probinsyal kun gusto kining makakuha og legal nga mga desisyon ug dili sa usa ka legal opinion gikan sa DILG.

Dugang sa maong tubag ni Bise Mayor Garcia nga nakapagawas sa maong legal opinion si Noval sa DILG-7 tungod usab sa gipasangil niya nga mga giusab nga estorya.

Giawhag hinuon ni Garcia si Mariñas nga mobarog sa kaugalingon ug dili mag-agad sa mando sa iyang mga advisers. – BANAT NEWS