Mga mayor uyon sa curfew

CEBU, Philippines - Si Mayor Nelson Garcia sa lungsod sa Dumanjog, kinsa maoy Presidente sa League of Municipality of the Philippines (LMP) Cebu Chapter mibutyag kagahapon nga walay pagsupak ang tanang mga mayor sa kalungsoran sa lalawigan bahin sa gisugyot nga pagpatuman sa curfew.

Gani iyang nasayran nga halos tanang lungsod may tagsa-tagsa na ka ordinansa apan lugak lang ang pagpatuman niini. Alang kang Garcia nga mahinungdanon kining curfew sanglit mao kini magpitol sa mga tawong dautan gikan sa pagbadhas bisan sa lawom nang kagabhion aron mobuhat og krimen.

Dugang usab ni Garcia nga kun tinuod ang gisulti sa mga Human Rights Group nga igo lamang gigamit ang mga menor de edad sa paghimo sa krimen, busa mahimo ra nga kapasakaan og kaso ang mga hamtong nga nagtukmod sa kabataan sa paghimo og dautan.

Sa samang higayon uyon usab si Garcia nga amendahon ang Juvenile Justice System Law aron dili makalingkawas sa balaod ang mga menor de edad nga makabuhat og krimen.

 Dugang pa ni Garcia nga ang maong isyu pagahisgutan unya nila sa tigom sa LMP Cebu Chapter karong Septembre  4.

Samtang sa bahin ni Mayor Paz Radaza sa dakbayan sa Lapulapu, siya nagkanayon nga dugay rang nagpatuman og curfew ang kagamhanan sa iyang dakbayan.

Karon nga nahisgotan na nga ipatuman ang curfew sa tibuok lalawigan, si Radaza nagkanayon nga dako kaayo siyang uyon niini. - Zipporah Cabardo Duria, Bong Soriano ug Romeo Limpangog (BANAT NEWS)