Bag-ong PRO-7 director mitubag sa isyu sa pagdala'g mga sakop dinhi

CEBU, Philippines - Giklaro sa hepe sa Police Regional Office (PRO-7) Chief Superintendent Ager Ontog ang nanggawas nga mga estorya nga nagdala siya og mga opisyales nga gikabalak-ang ihulip sa ubang opisyales sa PRO-7 gikan sa Camp Crame.

Matud pa ni Ontog bisan drayber wala siya magdala pag-anhi dinhi ug miklarong ang mga gipanghisgutan niyang mga opisyal atol sa iyang speech atol sa turnover of command niadtong Sabado pulos kadto iyang mga higala ug ang uban pulos na miretiro.

Mipasabot si Ontog wala siya’y nahuna-hunaang opisyales nga pahulipan diha sa PRO-7 tungod kay iyang napanglantawan nga nagtrabaho ang tanang opisyal sa PRO-7. “I don’t have any officers in mind that would replace the officers here. As long as they perform their job well, there’s no need for them to be replaced,” pasabot pa ni Ontog.

Sa laing bahin, si Ontog mibutyag nga adunay tukorong Human Rights Center sa kapolisan nga modawat sa mga sumbong gikan sa mga katawhan nga giabusaran sa kapolisan.

Mihangyo si Ontog sa iyang mga sakop nga respetuhon ang katungod sa mga tawo.

Kabahin sa isyu sa curfew, si Ontog miingon nga kinahanglang tun-an pa kini og maayo apan dako niini og papel ang mga local government units nga maoy mohimo og mga ordinansa alang niini.  – BANAT NEWS