Malou Loot nakahilak kay gikasab-an ni Gwen

CEBU, Philippines - Milugmaw ang mga luha ni Mayor Maria Luisa “Malou” Loot sa Daanbantayan sa dihang subli kining gikasab-an ni Gobernador Gwendolyn Garcia atol sa iyang pagbisita sa Kapitolyo niadtong milabay’ng adlaw.

Duha ka butang ang gitan-aw nga gikalagotan ni Garcia batok ni Loot. Kini mao ang kapakyas pagsalmot ni Loot sa Pasigarbo sa Sugbo niadtong Sabado nga gipasiugdahan sa Kapitolyo ug napilde ang gobernadora sa maong lungsod batok sa iyang kaatbang nga si kanhi Konsehal Hilario Davide III niadtong Mayo 10 nga eleksiyon.

Gibutyag ni Loot sa dihang nahinabi sa Bantay Radyo nga tuyo lang unta niya sa iyang pagbisita sa buhatan sa gobernadora ang pagpasabot sa wala niya pagsalmot sa Pasigarbo sa Sugbo karong tuiga tungod sa daghan nilang mga gastuhanan sama sa usbaw sa suholan sa ilang mga kawani human nahimo nang 1st class municipality ang ilang lungsod.

Sumala pa niya nga buot niyang makadaginot ang lungsod sa pundo tungod kay gikinahanglan man silang mogasto og P1.2 milyones kun mosalmot sa Pasigarbo sama sa ilang gihimo sa milabay’ng tuig.

Matud ni Loot nga mi-ulbo og samot ang kasuko ni Garcia sa dihang nangayo siya og ayuda alang sa pagpahigayon sa Haladaya Festival sa Daanbantayan karong Agosto 30. Dugang sa mayor nga iya pa gani nga gisultihan ang gobernadora nga misabot lang siya kun dili mohatag og hinabang pinansiyal ang gobernadora apan gi-imbitar lang niya kini pagtambong sa kalihukan apan mibalibad gihapon kini.

Gipasabot ni Loot nga wala na gyud siya makaantos sa pagpangasaba kaniya sa gobernadora ilabi na kay adunay daghang mga kawani sulod sa buhatan niini.

“Dili ko gusto kasab-an ni Gov. Gwen, dili pod ko ganahan i-treat murag slave, bahala’g dili mi tagaan basta dili lang sab mi yawyawan,” pasabot pa ni Loot.

Nasayran nga ikatulo na kining higayon nga gikasab-an si Loot ni Garcia.

Tungod niini, mibahad ang mayor nga dili na siya moduol sa buhatan sa gobernadora aron sa pagpangayo og ayuda.

“Dili na ko moadto sa Kapitolyo, dili na madala kapoy na kaayo sige og hilak, dili ko kaako’g sukol ni Gwen kay she’s my friend while dili pa siya gobernadora,” ni Loot pa.

Hinuon gidugang ni Loot nga magpabilin gihapon siyang sakop sa One Cebu Party bisan pa sa iyang kahimangod karon sa gobernadora tungod kay dili usab siya ganahan nga magbalhinbalhin og partido.

Apan iyang giklaro nga bukas karon ang ilang lungsod niadtong mga politikong gustong motabang ug mohatag og proyekto ug gipasalig niya nga mao kini ilang suportahan sa eleksyon unya sa 2013.   – BANAT NEWS