CEBU, Philippines - Samtang pabor si Gobernador Gwendolyn Garcia sa sugyot ni Bokal Sun Shimura nga ipatuman sa lalawigan ang curfew sa mga batan-ong minor de edad aron mamenosan ang krimen nga nalambigit sa kabatan-onan, managlahi ang baruganan sa kapolisan alang niini.
Nagtuo si Garcia nga ang curfew makapaundang sa mga krimen nga nalambigitan sa mga batan-on.
Si Chief Insp. Romeo Santander, hepe sa Regional Special Operation Group (RSOG) ug kasamtangan tigpamaba sa Police Regional Office-7 miingon nga dako siyang uyon niini.
Gihimong sanglitanan ni Santander, ang iyang kasinatian sa barangay clearing diha sa Pasil ning siyudad niadtong tuig 2003 sa dihang dunay curfew nga wala gyuy nakasulod nga batan-on sa nahisgutang lugar.
Apan giklaro ni Santander nga anaa ra ang approval niini sa bag-ong milingkod nga direktor sa Police Regional Office (PRO-7) nga si Chief Supt. Ages Ontog Jr. Apan sa dili pa ipatuman ang curfew sa dakbayan ug probinsya, kinahanglang dunay himuong conference tali sa kadagkuan sa kapolisan ug sa Local Government Units (LGU).
Apan sa iyang bahin, si Sr. Supt. Patrocinio Comendador, direktor sa Cebu City Police Office, mipadayag nga mahimong ipatuman ang curfew dinhi sa dakbayan apan tungod sa kakulangan sa pasilidad lisod kining ipatuman.
Iyang gihulagway nga ang curfew dili maoy sulbad sa problema sanglit kun ila kining panakpon ila ra gihapon i-uli ngadto sa ilang mga ginikanan tungod kay walay kabutangan kanila.
Matud ni Comendador mas maayong tutokan kadto rang mga barangay nga adunay daghang natalang krimen nga binuhatan sa mga batan-on.
Si Shimura sa iyang resolusyon nagkanayon nga ang Cebu maoy ikaduha sa Manila nga maoy mas daghang minor de edad nga nalambigit sa krimen niining unang kwarter sa 2010 itandi sa susamang kwarter sa milabay’ng tuig.
Si Garcia mihulagway sa curfew nga usa ka preventive measure tungod kay mahipos na ang kabataan ini’g alas 10 sa gabii hangtod alas 4 sa buntag. (BANATNEWS)