Santander mihimakak sa pasangil

CEBU, Philippines - Si Chief Insp. Romeo Santander, hepe sa Regional Special Operations Group (RSOG) ug kasamtangang tigpamaba sa PRO-7 hugot nga mihimakak sa migawas nga balita sa usa ka peryodiko sa miaging adlaw nga nagdala kuno og walo ka opisyal gikan sa Camp Crame si Chief Supt. Ages Ontog Jr. ,ang bag-ong milingkod nga hepe sa kapolisan dinhi sa Tunga-tungang Kabisay-an.

Si Ontog niadto lang Sabado milingkod sa PRO-7 human sa gipahigayong turn- over of command nila ni Chief Supt. Lani-O Nerez kinsa gibalhin na ngadto sa Directorate for Research and Development (DRD) sa Camp Crame alang sa iyang promosyon sa pagka two star general.

Tungod niining migawas nga report si Ontog gipatawag kagahapon ni Gobernador Gwendolyn Garcia ug gisuta   kun unsa ka tinuod   ang maong balita.

Matud ni Santander ang usa ka opisyal nga buot mohupot og posisyon kinahanglang moagi pa sa Senior Officer Placement Board (SOPB) didto sa Camp Crame kinsa maoy mopagawas og order. Hinuon si Sr. Supt. Josephus Angan kompirmado na nga mahibalik dinhi sa Sugbu gikan sa Camp Crame. (BANATNEWS)