AGI sa CCPO gipahigayon

CEBU, Philippines - Pormal nang gipahigayon kagahapon ang usa ka semanang Annual General Inspection (AGI) ug Operational Readiness Security Inspection Test and Evaluation (ORSITE) sa kapolisan sa Cebu City Police Office (CCPO).

Matud ni CCPO Director Sr. Supt. Patrocinio Comendador nga mikapin sa napulo ka scenario ang ilang himuon sulod sa usa ka semana nga kompetisyon sa tibuok nasud.

Kagahapon ang unang scenario mao ang immediate reaction quick drill diin ang mga sakop sa Civil Disturbance Management (CDM) mao kunohay ang naghimo og rally nga scenario nga gipakgang usab nilang malinawon.

Gisunod usab ang counter-terrorist scenario ug bank scenario diin may tulisan kunohay nga nang-hostage unya mipahigayon dayon og blocking operation ang kapolisan .

Matud ni Comendador nga ang tuyo niining AGI-ORSITE mao ang pagsukod sa kapolisan kun unsa kini ka andam motubag sa bisan unsang klase sa alarma nga motumaw dinhi sa dakbayan

Gibutyag ni Comendador nga iya gyung gidid-an ang tanan niyang mga sakop nga walay mopalta sa AGI-ORSITE gawas lang niadtong mga polis nga nag-duty sa ilang tagsa-tagsa ka buhatan.    (BANATNEWS)