Rob group sa Mindanao gisusi

CEBU, Philippines - Padayong gialerto sa kapulisan dinhi sa dakbayan ug Metro Cebu ang mga dagkong establisamento, bangko, pawnshops ug uban pa gumikan sa giingong presenya sa grupo sa mga tulisan gikan sa Mindanao nga ania dinhi human nakapanulis didto sa dakbayan sa Dumaguete.

Si Chief Insp. Romeo Santander, hepe sa Regional Special Operation Group (RSOG) nga tigpamaba sa PRO-7 miingon nga ila na daang gipanagana nga duna gyuy grupo sa tulisan gikan sa Ozamis nga moanhi sa Sugbu.

Matud ni Santander nga ila nang gipanglista ang grupo sa tulisan gikan sa Mindanao lakip na niini ang grupo nga mitulis sa usa ka pawnshop didto sa dakbayan sa Dumaguete diin nadala ang dili momenos P400 mil sa alahas.

Subay sa nadawat nga impormasyon sa kapulisan human gitulis sa grupo ang pawnshop niadtong Agosto 7 ug miagi sa dakbayan sa Toledo paingon dinhi sa dakbayan apan ang duha sa lima ka tulisan nadakpan sa follow-up operation sa Dumaguete.

Si Santander nagkanayon nga sa wala pa makaigo didto sa Dumaguete ang maong grupo, dinhi sila sa dakbayan sa Sugbu magpundo samtang giplano pa ang ilang operasyon.

Ang hepe sa Regional Intelligence Division (RID)-7 nga si Sr. Supt. Melvin Buenafe mipasidaan na sa mga sakop sa Cebu Bankers Association pagpahugot sa ilang seguridad.

Sa iyang bahin ang hepe sa Cebu City Police Office nga si Sr. Supt. Patrocinio Comendador mitataw nga nakadawat usab siya og reports sa miaging semana kabahin sa nahitabo sa dakbayan sa Dumaguete.

Gani matud ni Comendador nga ang target sa maong grupo mao ang Sugbu ug Manila hinungdan nga mimando kini sa tanang hepe sa onse ka police stations ug sa Mobile Patrol Group nga pahugtan ang pagbantay sa ilang tagsa-tagsa ka hurisdiksyon.

Lakip sa gibantayan ang mga bangko, pawnshops, gasoline stations ug lending company.

Hinuon nagkanayon si Comendador nga ilaha nang nailhan ang upat nga miyembro niining maong grupo nga nalambigit na usab sa mga pagpanulis didto sa Mindanao ilabina sa Ozamis City.  (BANATNEWS)