Sony O nibalos ni Gwen tungod sa pagtawag niya og lawos

CEBU, Philippines - Si kanhi Senador John “Sony” Osmeña nagpangusmo sa kalagot nga nagkanayon gihilasan siya kang gobernador Gwen Garcia kinsa mihingalan kaniyang lawos na.

Ang pamahayag ni Osmeña maoy silbi tubag niya sa komentaryo sa gobernadora batok kaniya nga nag-awhag sa katawhan nga dili na siya angayang paminawon kay lawos na.

Matud pa niOsmeña sa interview sa DyRF nga abi kaha ni gobernadorGarcia nga dili siya malawos busa gihilasan siya kay ang pagkatawo sa tawo ug ang pagka-politiko padulong ra ba yud ang tanan sa pagkalawos.

Gani nakaingon ang kanhi senador nga kun sa pagkatawo mas-arang-arang sud-ongon ang lalaki nga malawos kay sa babaye ilabi na kun motikuko na.

Busa miingon si Osmeña nga nagpatugatuga og panaway kaniya si gobernador Garcia nga mas lawos pa man ang pagkatawo sa iyang amahan nga si Kongresista Pablo Garcia sa ikaduhang distrito sa Sugbo kay kaniya.

Kini tungod kay matud pa niya nga mas tiguwang pa kay kaniya ang amahan sa gobernadora ug mas kusgan pa siya ug tanus pa ang barog kay ni Kongresista Pablo Garcia, matud pa ni Osmeña.

Sumala pa sa kanhi senador nga siya makatarong pa og lakaw ug makasaka pa sa hagdanan sa mga building apan ang amahan sa gobernadora matud pa sa mga kauban niini magsaguyod na ang tiil sa paglakaw ug kusog pay tipal-o. (BANATNEWS)