Kaso ni Velasquez di madali-ombuds

CEBU, Philippines - Ang Ombudsman Visayas dili makapadali sa ilang pag-imbestigar ug pagsilot sa hepe sa homicide section sa Cebu City Police Office kun dili mopirma og affidavit of complaint ang gisagpang reporter.

Matud pa ni Assistant Ombudsman for the Visayas Virginia Palanca Santiago sa interbyu sa DyRF nga malangay ang imbestigasyon sa Office of the Deputy Ombudsman for the Military and Other law Enforcement Office kun mohimo og imbestigasyon batok ni ChiefInsp. Vicente Velasquez kun ipaagi lamang kini sa fact finding investigation.

Si Santiago nagkanayon nga ang fact finding investigation dili haom alang sa dinaliang aksyon batok kang Velasquez sanglit sulod lamang sa duha ka bulan ang prescription sa kasong maltreatment o physical injury.

Matud pa ni Santiago nga kun makapirma og sworn statement ug certificate of non-forum shopping ang biktima nga si Lesley Caminade nga reporter ning pamantalaang Banat News ug sa DyLA, diretso na ang imbestigasyon.

Gipasabot ni Santiago nga kun magdumili sa pag-execute og affidavit of complaint ang biktima mahimo nga ang laing sakop sa media nga nakakita sa maong panghitabo ang mopirma sa complaint tungod kay ang gihimo nga pagpanagpa sulod man sa usa ka public office.

Sa higayon nga may mapirmahang affidavit of complaint, si Santiago mipasalig nga dili na gyud basta ma-dismiss pa ang kaso ug masilutan gyud ang nahisgutang opisyal.

Gihimong ehemplo ni Santiago ang pagkatangtang sa Presidential Security Group ni kanhi presidente Fidel Ramos nga namukbok og reporter kaniadto, ang maong reporter mipirma og affidavit of complaint hinungdan nga nakonbikto gyud ang sakop saPSG.

Dugang ni Santiago nga naluoy siya sa polis apan tungod kay nakahimo siya sa maong public offense angayan niya kining atubangon. (BANATNEWS)