CEBU, Philippines - Samdan ang usa ka polis sa lungsod sa Samboan human dunggaba sa usa ka hubog nga lalaking ilang girespondehan gumikan sa pagmaoy pasado alas-6 sa miaging gabii sa barangay Punong sa nahigsutgang lungsod.
Ang biktima nailhan nga si PO2 Catalino Ricablanca, sakop sa kapolisan sa lungsod sa Samboan samtang ang suspetsado nailhan nga si Manuel Balbuena Jr., molupyo sa nahigsutang lugar.
Base sa imbestigasyon sa kapolisan, nakadawat og trouble alarm ang presinto kabahin sa pagmaoy sa usa ka hubog diha sa maong barangay hinungdan nga girespondehan kini sa grupo nila ni Ricablanca.
Sa diha nga naabot na sila sa maong lugar naabtan sa biktima ang suspetsado nga hubog kini ug nanghagis hinungdan nga iya kining giduol ug gipugngan sa iyang gipangbuhat.
Apan imbes kini mokalma mikalit hinuon og duslak sa tuong bukton sa maong polis hinungdan sa pagkasamad niini ug napugos si Ricablanca sa pagpusil sa walang tiil sa suspek gamit ang iyang M-16 Armalite Rifle.
Mikalma ang suspek sa dihang naigo sa armalite sa bala ug daling napugngan ug gitabangan pagdala sa Malabuyoc District Hospital dungan kang Ricablanca.
Sa pakighinabi sa Banat News sa hepe sa kapolisan sa lalawigan sa Sugbo Sr. Supt. Erson Digal kini mibutyag nga ilang ipaubos sa imbestigasyon si Ricablanca pagtino kun unsa gyuy nahitabo. (BANATNEWS)