Bongbong pabor brgy poll isibog

CEBU, Philippines - Pabor si Senador Ferdinand ‘Bongbong’ Marcos nga i-oktaba una ang Sangguniang Kabataan ug Barangay Elections apan supak siyang hingpit nga wagtangon ang SK.

Si Marcos atol sa iyang press conference kagahapong adlawa diha sa Marco Polo Hotel sa barangay Lahug mibutyag nga nakaduso na siya og Senate Bill nga nag-awhag sa pag-oktaba sa barangay election ngadto na sa sunod tuig.

Buot ni Marcos nga masugdan na dayon ang debate sa Senate Committee on Local Government nga iyang gihuptan isip maoy tsirman pagpaminaw kun ipadayon ang barangay election karong bulan sa Oktubre.

Gani gipahibawo ni Marcos nga karong adlawa ang Senado magsugod na sa pagpahigayon og Konsultasyon sa tanang mga sector. Matud pa ni Marcos nga iyang gipang-imbetar ang mga opisyales sa League of Province of the Philippines, League of Cities of the Philipines, League of Municipalities of the Philippines, Philippine Councilors League ug liga sa mga kabarangayan sa tibuok Pilipinas.

Si Marcos niingon nga tukion sa iyang komitiba ang tanang sugyot sa nagkadaiyang mga sector sa pag-oktaba sa mga barangay election apil na ang pag-abolish o pag-usab sa structure sa Sanguniang Kabataan.

Sigon pa ni Marcos nga ilang pagahimuon ang maong konsultasyon sa labing daling panahon tungod kay hapit na usab moabot ang election sa Oktubre.

Si Marcos nagkanayon nga pabor siya nga ma-oktaba og usa ka tuig ang election sa barangay aron mahatagan og igong panahon sa pagtuon sa mga magbabalaod, kapugngan ang panagbahinbahin sa politika ug uban pa.

Supak usab si Marcos nga i-abolish ang SK tungod kay ang kadaghan sa naglangkob sa populasyon sa nasud mao man ang mga batan-on busa angayan lamang nga hatagan kini og representasyon.

Apan uyon siya nga usbon ang structure sa SK ug ang mga chairman apil na ang vice chairman mao lamang ang angayan nga pilion kay dili na kinahanglan ang konseho sa SK. (BANATNEWS)