Kanseron sa Sugbo midaghan

CEBU, Philippines - Misaka na ang gidaghaon sa mga tawong nataptan sa sakit nga kanser dinhi sa dakbayan sa Sugbo, sumala sa labing ulahing taho sa Aboitiz Cancer Center (ACC) base sa ilang survey nga nag-ulohan, The Metro Cebu Population-Based Cancer Registry Report.

Sa ilang pagtuon nasayran nga gikan sa tuig 2007-hangtod sa tuig 2030 mosaka ang kaso sa kanser gikan sa 11.3 milyones ngadto sa 15.5 milyones o sa gidaghanong 45% nga usbaw.

Sa survey nga gipahigayon sa ACC nga nagbase sa Vicente Sotto Memorial Medical Center, gikataho nga ang kanser sa atay maoy nag-una sa kadaghang nasugamak niini nga kasagaran lalaki.

Niining maong sakit mikabat na sa 2214 ka mga kaso ang na-rekord sa ACC dinhi sa Sugbo, samtang gisundan usab sa kaso sa breast cancer diin mikabat og 2378 ang mga nataptan niini kinsa kasagaran mga babaye.

Ang ikatulong matang sa kanser nga mibiktima usab og daghang kinabuhi mao ang kanser sa baga nga walay gipili, malalaki man o babaye.

Kasagaran sa mga nabiktima niining sakita mao ang mga hinigarilyo nga lalaki ug babaye, sumala sa mga pagtuon.

Si Dr. Enrique T. Ona, Secretary sa Department of Health (DOH) nagkanayon nga kinahanglang magparehistro sa PhilHealth ang matag-usa ilabina ang mga kabus ug timawa.

Iyang gipahibawo ang ilusad nilang pagpangrehistro karong ikaduhang semana sa Oktubre, busa giawhag niya ang tanan nga maningkamot gyud nga magparehistro sa Philhealth sa maong higayon aron mahimo na silang kabahin sa programa nga gipasiugdahan sa DOH. (BANAT)