Mga Koreano mitukod og balay

CEBU, Philippines - Singkwenta ka mga tinun-ang Koreano nga sakop sa World Disaster Relief Organization (WDRO) libreng mitukod ug namanday sa mga gubaong balay sa mga kabus nga residente sa dakbayan sa Sugbu ug sa dakbayan sa Mandaue.

Matud pa ni Kwon Kyung Hyun ang Project Manager sa WDRO nga unang higayon kini nga ilang gihimo dinhi sa Sugbu apan mihimo na sila og susamang proyekto sa Quezon City, Taytay City ug Antipolo City lalawigan sa Rizal.

Sumala pa niya nga ang proyekto ilang gihimo agi og balos sa nahimong tabang ug abag sa mga Pilipinong sundalo ngadto sa ilang nasud sa South Korea nga nakigbatok sa ilang kaaway atol sa Korean War tali sa North Korea.

Gumikan niini nahunahunaan sa mga sakop sa WDRO nga tabangan ang mga kabus nga walay panimalay ug ang mga gubaon nga balay ilang ayuhon pinaagi usab sa ilang mga volunteers nga mga tinun-an sa Korea nga nagbakasyon.

Usa ka balay sa sitio Camagong sa barangay Lahug ang ilang gitukod ug kini gipanag-iya ni “Lyka” (ngan gitago kay minor de edad) 17-anyos ug adunay usa ka anak lalaki nga ang amahan usa ka Koreano human kini mamabdos ug wala na kini balika sa maong langyaw.

Sa dihang nasayran sa WDRO ang estorya sa kinabuhi ni Lyka ilahang gisukip sa ilang proyekto nga kini matabangan.

Si Lee Young Sik ang Project Engineer sa WDRO nagkanayon ang maong panimalay adunay gidak-on nga 30 metro kwadrado ug duha kini ka andana nga gama sa kongkreto nga estraktura ug mokantidad og P150 mil ug humanon kini sud sa tulo ka semana sa dili pa mobalik ngadto sa nasud sa Korea ang mga sakop sa WDRO.

Matud pa ni Kwon kini isip tabang usab nila sa mga “Korpino” kun Korean Pilipino nga ilang nakita nga nagkalisodlisod sa ilang kahimtang.

Samtang susama gihapon ang gidak-on sa panimalay nga ilang gitukod didto sa Jagobiao dakbayan sa Mandaue ug laing upat ka balay ang ilang i-repair gumikan sa kagubaon na niini.

Si Charlie Shin ang Vice President sa Korean Community sa Sugbu ug Coordinator sa WDRO mibutyag nga daghan pang mga proyekto ang himuon lakip sa ilang plano mao ang dugang panimalay alang sa mga kabus, pagtukod og mga idepisyo alang sa mga day care centers, pag-abag sa mga nasunogan, pagbutang og mga pansayan sa mga remote areas ug uban pa. (BANATNEWS)