CEBU, Philippines - Nayagyag ang ginhawaan sa usa ka 25-anyos nga ulitawo human kini dunggaba sa usa ka hubog nga nasuko tungod sa komedya diha sa barangay Ginacot siyudad sa Danao niadtong Huwebes sa alas 8:00 sa gabii.
Ang biktima mao si Rolland Perez, 25, molupyo sa nahisgutang lugar, samtang ang suspek mao ra ang iyang silingan nga si Roy Capuyan.
Matud ni SPO4 Jose Salingua Jr., sa Danao City Police Station dihang nahinabi sa Banat News base sa imbestigasyon nanan-aw og salida sa telebisyon sa ilang silingan ang biktima dihang kalit nga miabot ang suspek nga hubog.
Tungod kay managkaila ang duha gikomedyahan niini ang suspek apan nasuko kini ug mikuha og kutsilyo dayon gihansakan og dunggab sa kilid.
Matod pa nayagyag gyud ang ginhawaan sa biktima ug naratol ang suspek pagkakita niini hinungdan nga mikaratil og dagan pahilayo biniyaan ang kutsilyo nga iyang gigamit.
Ang mga estambay sa maong lugar mao nay nagtinabangay pagdala sa biktima sa Danao District Hospital apan tungod sa kagrabe sa samad niini gibalhin kini dayun sa Vicente Sotto Memorial Medical Center (VSMMC).
Ang mirespondeng mga polis nakakuha og kutsilyo nga giingong nabiyaan sa crime scene sa suspek. (BANATNEWS)