CEBU, Philippines - Nabalhog sa Talisay City Detention cell ang usa ka Australiano kinsa giingong hubog ug mituok sa iyang kapuyo human mag-wild diha sa Talisay City Police Station sa barangay Poblacion, dakbayan sa Talisay kagahapon sa kaadlawon.
Ang suspetsado mao si Shaun Connellan, 25, Australiano nga nagpuyo diha sa Villa Solana, barangay Pooc, dakbayan sa Talisay.
Si Connellan kinsa usa ka “six footer” ang gitas-on sa barog gipasanginlang mituok sa iyang kapuyo nga si Mylene Ortega, 39, residente usab sa maong lugar apan nakabuhi kini human paaka sa biktima ang kuyamoy sa kamot niini.
Mga alas 11:50 sa gabii niadtong Huwebes ang guard on duty sa Villa Solana nanawag diha sa Talisay City Police Station ug mi-report kabahin sa nahitabong kagubot diha sulod sa subdivision.
Sila si PO1 Rico Reboquio ug PO1 Rosauro Pasumala daling mitubag sa maong alarma. Si Connellan ug Ortega gidala sa maong mga polis diha sa TCPS aron unta husayon apan ang maong langyaw giingong hubog ug padayon sa pagpangisog ug nanghasi na hinuon sa mga polis dihang dad-on na unta kini sa karsel.
Hinungdan nga si PO3 Arnold Damasco ug PO2 Leandro Azarcon miduol ug maoy nagtabang og posas tungod kay mikisi-kisi kini og maayo niadtong higayona hinungdan nga nahitabo ang linayogay hangtud nga ang mga polis ug suspetsado nangaligid diha sa yuta. (BANATNEWS)