Police sa MPG-CCPO gikonbikto sa Ombudsman

CEBU, Philippines - Usa ka polis sa Mobile Patrol Group gikonbikto sa Office of the Deputy Ombudsman for the Military and Other law Enforcement Office sa kasong abuse of authority and misconduct tungod sa illegal nga pagpadakop ug pagpabilanggo sa iyang mga silingan.

Ang gikonbikto ni Deputy Ombudsman for the Military and Other Law Enforcement Officer Emilio Gonzalez III mao si SPO1 Ricardo F. Abesia Jr. nga lumulupyo sa F. Rallos, Pasil ning dakbayan.

Si Gonzalez mipahamtang og silot nga pagkasuspenso sulod sa usa ka tuig nga walay sweldong madawat ngadto sa akusadong polis nga si Abesia.

Sumala pa ni Gonzalez sa iyang lima ka pahina nga desisyon nga giaprubahan ni Ombudsman Ma. Merceditas Gutierrez nga si SPO1 Abesia Jr. napakyas sa pagpamatuod nga legal ang iyang pagdakop ug pagpabilanggo sa mga silingan ug kaubanan.

Ang mga kihante mao sila si Filamer Cabanday , Feldan Belarmino, pulos taga F. Rallos, Pasil, Cebu City ug silingan sa polis, George Ramayra nga taga San Nicolas ning siyudad sa Sugbu ug si Roel Daclan nga taga dakbayan sa Mandaue.

Gipasanginlan nila si Abesia nga illegal nga misikop kanila ug mikilkil kanila og P7 mil alang sa ilang kagawasan human sila pasanginling nanglungkab sa usa ka balay niadtong Septiyembre 16,2005. Si SPO1 Abesia sa iyang counter affidavit mihimakak sa tanang mga alegasyon sa mga reklamante ug mitumbok nga niangkon ingon man nangayo pa og pasaylo ang mga reklamante ngadto ni Racal hinungdan nga kini gipagawas.

Apan napakyas kini sa pagsumitir sa iyang position paper lakip na usab ang affidavit ni Racal nga nagsuporta sa iyang pangangkon hinungdan nga gikombikto kini. (BANATNEWS)