Testigo sa Yongco-murder gisusi kun apil sa Reynes-ambush

CEBU, Philippines - Testigo sa kontrobersyal nga pagpatay sa abogadang si Arbet Sta. Ana-Yongco diha sa dalan Sikatuna sa barangay Zapatera ning dakbayan niadtong Oktubre 2004 maoy gisusi kun may kalambigitan sa pagbanhig kang kanhi Compostela mayor Joselito ‘Kokoy’ Reynes.

Si Sr. Supt. Erson Digal mibutyag nga si Ely Doncillo Ardita, molupyo sa Poblacion sa maong lungsod gisikop sa Provincial Investigation and Detective Management Branch (PIDMB) pinangulohan ni SPO4 Lamberto Hibaya.

Ang PIDMB nakadawat og impormasyon nga ang motorsiklong gigamit sa pagbanhig patay kang Reynes nasigpatan nga nagdagan-dagan sa maong lungsod.

Matud ni Digal nga si Ardita nga nag-camouflage niadtong higayona ug gipara sa PIDMB ug gipangayoa’g rehistro sa motorsiklo, apan napakyas kini sa pagpakita sa rehistro ug mirason nga ang motorsiklong iyang gidala pinalit sa iyang inahan. Dihang gisusi sa kapulisan sa Land Transportation Office (LTO), nasuta nga ang motorsiklong nagtangag sa plakang GI-9773 gipanag-iya sa usa ka Aireen Vallena Garcia sa barangay Tabok lungsod sa Liloan.

Matud ni Digal si Garcia mitug-an kanila nga ang motorsiklo gidala sa iyang manghod Raul Basamayor Vallena niadtong 2008 apan gipusil patay kini diha sa Liloan.

Tungod niini si Ardita gipasakaan kagahapong adlawa og kasong kalapasan sa Anti-Carnapping Law.

Si Digal nagkanayon nga si Ardita maoy drayber sa gipasanginlang gunman sa pagpatay kang Yongco nga si Mitchell Favila. Si Favila namatay na dul-an duha na ka tuig ang nakalabay sulod sa bilanggoan nga wala maresolbar ang kaso.

Si Yongco maoy lead private prosecutor sa kaso batok sa kasong parricide batok ni Philippine Benevolent Missionary Association "Divine Master" ug karon Kongresista Ruben Ecleo, Jr. Sa ambush kang Reynes, si Digal miingon nga adunay nagtumbok nga susama ni Ardita nga nag-camouflage ang giingong nagmaneho sa motorsiklo sa gunman nga si Wilson Pasaol, apan nagdumili hinuon kini pagkonektar sa kaso ni Reynes tungod sa kakulang sa ebidensya. (BANATNEWS)