CEBU, Philippines - Mitahan sa kapolisan sa dakbayan sa Talisay niadtong Miyerkules sa gabii ang 20-anyos nga suspetsado sa pagpusil sa usa ka kahera sa Corridor 3 Videoke niadtong Lunes sa alas 6:00 sa gabii diha sa sitio Sangi, barangay Tabunok, dakbayan sa Talisay.
Si Kent Edmil Cañedo, taga Ruiz Compound, barangay Tabunok miangkon nga maoy nakapusil kang Mary Ann Alcanzado, 26, taga sitio Cawayan, barangay San Isidro ug kahera sa maong imnanan.
Si Alcanzado kinsa naigo sa agtang ubos pa karon sa kritikal nga kahimtang.
Si Cañedo nga nahinabi sa Banat News mibutyag nga sakop siya sa grupong “True Brown Style (TBS 13) nga usa ka laing grupo sa gang.
Niadtong Lunes sa udto nag-inom siya ug ang iyang mga barkada diha sa gitrabahoan ni Alcanzado apan giingong ang biktima mibadlong kanila tungod sa pagtungtong nila sa ilang mga tiil sa lamesa.
Ang suspetsado mipasangil sa biktima nga giinitan ang usa nila ka kauban ug nagsige kini og yawyaw ug mikuha og video sa ilang grupo dayon nagpunay og ‘psy-war’ kanila.
Tungod niini iyang gibunot ang giluklok nga .38 nga rebolber nga matud pa niya iyang gi-hammer daan apan mibuto kini ug naigo ang agtang sa biktima.
Ang suspetsado nagkanayon nga dili niya tumong nga pusilon si Alcanzado buot lang niya unta kadtong hadlukon. – BANAT NEWS