Ambush sa Mandaue, 5 suspek gibalhog

CEBU, Philippines - Gibalhog sa Mandaue City Jail ang lima ka mga suspetsado sa pagpamanhig sa usa ka negosyanteng babaye nga nakaingon usab sa kamatayon sa drayber niini human usab sa pagpasaka sa kapolisan og mga kasong murder, attempted murder ug illegal position of firearms ngadto sa korte.

Si SPO4 Areston Bataluna sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News mitug-an nga gibalhog na sila si Rodelito Buenavista, 20, Provil Dano Inihao, 20, ug Aldrin Montecalvo, 20, nga taga dalan Maximo Patalingjug sa barangay Basak, dakbayan sa Lapulapu.

Ang duha ka mga suspetsado nga sila si Marites Velasco, 34 ug John Joy Palopalo, 20, gipasakaan og tulo ka mga kaso nga naglakip sa murder, attempted murder ug illegal nga paghupot sa armas.

Ang lima ka mga gibalhog sa Mandaue City Jail maoy suspetsado sa pagbanhig kang Debie Yu ug sa drayber niining si Sonny Boy Mahilom kinsa namatay sulod sa tambalanan.

Samtang mga kasong murder ug attempted murder usab ang ilang gipasaka batok nila ni Inihao, Buenavista ug Montecalvo.

Dugang pa ni SPO4 Bataluna nga si Montecalvo maoy giingong triggerman sa maong pagpamanhig.

Gitataw ni SPO4 Bataluna nga si Velasco nga nalambigit sa lending business maoy gipasanginlang ‘mastermind’ sa maong pagpamanhig apan wala pa usab nila matataw ang hinungdan sanglit nagdumili pa man kini sa paghatag og dugang pa nga mga pamahayag. – BANAT NEWS