CEBU, Philippines - Si Sr. Supt. Erson Digal, hepe sa kapulisan sa probinsya sa Sugbo mipahibawo kagahapon nga makig-alayon siya sa local nga mga opisyal sa kagamhanan sa dakbayan sa Danao aron iyang ipatawag kadtong manghimoay og armas diha sa maong dakbayan.Si Digal miingon nga gimandoan siya ni PRO-7 Chief Supt. Lani-O Nerez atol sa ilang meeting uban kang gobernador Gwendolyn Garcia sa miaging adlaw nga ipatawag ang tanang manghimoay og armas sa dakbayan sa Danao aron hisgotan unsay ilang buhatong lakang nga masumpo o maminus-minosan ang naghupot og loose firearm.Matud niya nga ilang nakita nga ang armas nga gipanggamit sa mga kriminal kasagaran naggikan sa dakbayan sa Danao. Apan niingon siya nga sa milabayng tuig nga gipatawag nila ang manghimoay og armas sa maong siyudad,didto ilang nahibaw-an ang problema kay kasagaran kanila mipadayag nga mas maayo pang mamaligya sila sa ilang armas sa gawas kay mahalin pa dayon kaysa ilang i-deal ngadto sa cooperative kay dugay kaayong mahalin ug dugay silang makakuwarta.Si Nerez mimando usab kang Digal nga susihon kun asa nagagikan ang mga materyales nga gamiton sa paggama og armas diha sa Danao.Ang kapolisan dinhi sa Central Visayas ilabina na sa probinsya padayong nanghingusog sa kampanya nga “Oplan Boga” ug “Bilang Boga” nga nag-awhag sa mga katawhan nga naghupot og dili lisensyadong armas sa pagtahan niini. Apan ang maong kampanya gituohang gibaliwala sa uban ilabi na kadtong mga kriminal nga maoy hinungdan sa padayon krimin sa dakbayan ug probinsya nga kasagaran binuhatan sa gun for hire. – BANAT NEWS