CEBU, Philippines - Hugtanong gihimakak ni Cebu City Fire Marshal Esmael Codilla ang mga pasangil nga pagpabaya ug pagkaway kabangkaagan nila sa firefighting human sa dakong sunog nga nahitabo didto sa barangay T. Padilla ning dakbayan sa Sugbo niadtong Lunes sa hapon nga miugdaw og 250 ka panimalay nga nakapaapektar sa 1,500 ka tawo.
Pipila ka mga biktima sa sunog lakip si Mayor Michael Rama mipadayag nga wala sila matagbaw sa gipakitang performance sa kabomberohan sa pagpakigbatok sa kayo sa maong higayon.
Apan gipasabot ni Codilla sa Banat News nga kuwang kaayo sila og mga kahimanan ilabi na kasagaran sa ilang mga hose karaan ug mga busloton na ug ang kalisod pagsulod sa gagmay kaayong mga karsada, maoy pipila sa mga hinungdan sa kapakyas nila pagpasirit og tubig ngadto sa suok nga bahin sa nasunogan.
Matud pa ni Codilla nga kini maoy hinungdan nga napugos sila pagsumpay sumpay sa ilang mga hose aron makaabot sa fire scene ang tubig ug ang pagdaghan ang sinumpayan makapahinay usab sa pressure sa tubig niini.Midugang si Codilla nga gihimo gyud nila ang tanang paningkamot atol sa maong sunog apan didto ra kutob ang ilang maabot tungod usab sa mga kakuli-an nga dili kalikayan.Nunot niini gisugyot ni Codilla nga ipatuman ang kausaban sama sa pagpahiluna og maayo sa mga kadalanan ilabina kun ang mga biktima magpatukod og balik sa ilang balay.
Alang kang Codilla nga kun may hustong agianan ang mga firetruck dili suliran ang pagpasirit og tubig ngadto sa mga kabalayang nasunog.
Gipahibawo usab ni Codilla nga subay sa ilang gihimong imbentaryo misaka ngadto sa P13 milyones ang danyos sa sunog sa T. Padilla. - BANAT NEWS