CEBU, Philippines - Pilipinas usa sa mga nag- unang napulo ka nasud nga adunay kinabag-ang numero sa TB sumala sa tala sa World Health Organization.
Ang tuberculosis (TB) usa ka mananakod nga sakit nga adunay kagaw nga makaimpeksyon sa baga sa tawo ug sa lain pang bahin sa kalawasan, lakip na niini ang utok, amimislon ug ang mga kabukugan.
Si Dr. Enrique Sancho, hepe sa Communicable Disease Section Head Center for Health Development sa Department of Health (DOH)-7 nagkanayon nga ang TB usa sa nag-unang sakit nga makamatay dinhi sa nasud.
Sa Kapihan sa PIA nga gipahigayon didto sa DOH Regional Office 7, kagahapon sa buntag gibutyag ni Sancho nga ang TB adunay kagaw nga gitawag nga Myobacterium nga motakod ngadto sa tawo pinaagi sa pag-ubo, pangatsi ug uban pang paagi sa paghanggap sa gininhawa sa usa ka masakiton og TB.
Gitug-an ni Sancho nga dinhi sa Central Visayas, sa matag usa ka gatos ka libo (100,000) adunay 133 ka masakiton og TB.
Midugang siya nga ang gikinahanglan lang sa mataptan sa maong sakit nga motuman sa gitudlo sa mga doctor nga paagi aron dali rang maayo ang iyang sakit.
Samtang si Dra. Sharon Azenith Laurel, hepe sa Programmatic Management for Drug Resistant TB nagkanayon nga mohatag sila og libre nga konsultasyon ug pag-eksamin sa mga pasyente sa TB.
May libre usab silang tambal nga ihatag ngadto sa maong mga pasyente.
Ang buhaton sa mga tawo nga may ubo nga milanat na og duha ka semana, mas maayong magpakunsolta dayon sa doctor aron masayran kun wala ba siya hitapti sa sakit nga TB.
Midugang siya nga ang kagaw sa TB anaa sa tanang lawas sa tawo gikan sa mga bata hangtod sa mga tiguwang.
Inigkaluya sa resistensya sa tawo gumikan sa kakuwang sa kaon, subrang kahago, kuwang sa pahulay, kuwang sa tulog, panigarilyo ug uban pa, anha na moataki sa kagaw sa TB ug kun dili madali siguradong mamatay gyud ang tawo, matud pa ni Dr. Sancho. - BANAT NEWS