Kahera sa videokehan gipusil
CEBU, Philippines - Kritikal ang kondisyon sa usa ka kahera sa videoke bar human kini pusila sa kostumer nilang wala hiilhi sa ilang videokehan sa sitio Sangi, barangay Tabunok, dakbayan sa Talisay sa miaging gabii.
Ang biktima giila lang sa ngalang “Mary Ann” kahera sa Corridor 3 Videoke.
Base sa imbestigasyon ni PO3 Alfredo Cuizon nasayran nga ang grupo sa namusil nag-inom diha sa maong imnanan.
Dihang migawas si Mary Ann sa cashier’s both ang lalaki nga kauban sa grupo mibarog ug giduol ang biktima ug dayon gipusil.
Human maigo sa agtang ang biktima, ang kriminal misulod sa cashier’s both ug gikuha ang halin sa imnanan, bag, ug cellphone sa biktima dayong ikyas.
Si Mary Ann daling gidala ngadto sa Talisay City District Hospital apan gibalhin kini ngadto sa Chong Hua Hospital.
Si PO2 Narciso Alforque, duty desk officer sa Talisay City Police Office nagkanayon nga gihimoan pa og follow-up sa iyang mga kauban ang maong hitabo aron pagsuta sa tinud-anay nga motibo sa maong krimen.
Samtang padayon pa nilang gipangita ang criminal ug ang mga kauban niini. – BANAT NEWS
- Latest
- Trending
