Lolo nga may sakit naghikog

CEBU, Philippines - Gumikan sa sakit nga cancer usa ka 60 anyos nga biyudo naghikog didto sa iyang balay sa Purok Saging, Barangay Gun-ob, dakbayan sa Lapulapu sa milabay’ng gabii.

Ang nagpakamatay mao si Dionesio Sumalinog Godines, 60, biyudo nga nagpuyo sa maong dapit.

Sa imbestigasyon ni PO3 Diocoro Arong ug PO1 Rechele Origenes sa Homicide Section sa Lapulapu Police Station, nasuta nga sa mga alas 6:45 sa milabay’ng hapon si Francisco Godines, igsoon sa biktima, maoy nakakita kang Dionesio nga nagbitay na pinaagi sa pisi nga gihikot sa iyang liog sulod sa lawak niini.

 Nasayran nga ang tumoy sa nylon nga pisi gibitik sa iyang liog samtang ang pikas tumoy niini gigaid sa sagbayan sa balay. Diha sa sawog napalgang nagluhod si Dionesio nga hiniktan ang liog nga wala nay kinabuhi.

Si Francisco mibutyag sa kapolisan nga walay laing gidudahan sa pamilya nga hinungdan sa pagpakamatay ni Dionesio gawas sa iyang sakit sa tinae diin nasuta nga usa na kini ka “Colon cancer” nga gikaguol niya og maayo.

 Sa buhi pa si Dionesio mitug-an kini kang Francisco nga nalooy siya sa iyang pamilya nga nag-antos sa kalisod sa pagginasto sa iyang pagpatambal sa sakit nga cancer.

Samtang si PO3 Arong ug PO1 Origenes walay nakitang foul play sa kamatayon ni Dionesio ug ang pamilya niini kombensido nga nagpakamatay ang biktima gumikan sa iyang sakit.   – BANAT NEWS