CEBU, Philippines - Kanhi asset sa kapolisan sa Cebu City Police Police Office gipusil patay sa usa ka armadong wala mailhing tawo uban sa laing tulo nga giingong “lookouts” sa miaging alas-8 sa gabii diha sa dalan M.J Cuenco Avenue sitio Estacionan barangay Mabolo ning siyudad.
Ang biktima nga patay diha-diha mao si Jose Yu “Alyas” Tatay, giingong sugosugoon sa Mabolo Police Station ug residente sa Casals Village sa barangay Mabolo.
Sa gihimong imbestigasyon sa Homicide Section pinangulohan ni SPO3 Rey Cuyos, naglakaw ang biktima ug kalit gibabagan sa usa ka armadong tawo ug sa walay igong hinungdan gipusil kini makadaghang higayon gamit ang gituohang .45 nga kalibre sa armas.
Gawas sa mamumuno aduna pay laing tulo nga backup ug lookout nga nagpahipi sa daplin. Nakuha diha sa Crime Scene Investigation (CSI) ang tulo ka kabhang sa .45 kalibreng bala, pitaka sa biktima nga dunay sulod nga P70 ug relo.
Si Sr. Supt. Patrocinio Comendador, hepe sa kapolisan sa dakbayan mibutyag nga dili na konektado si Yu isip sakop sa Barangay Intelligence Network (BIN) human nila gitangtang sa listahan kaniadto sa dihang misulod kini sa ilegal nga kalihukan. Hinuon nagkanayon si Comendador nga sa pagkakaron gihimo na lang kini nga suloguon sa mga polis diha sa Mabolo Police Station.
Matud ni Comendador nga nakadawat siya og report kaniadto nga si Yu giingong “mitambling” sa kwarta sa ilegal nga drugas ug dili lang dinhi sa dakbayan kun dili lakip na sa Mandaue. – BANAT NEWS