Gipatay samtang nagsayaw

CEBU, Philippines - Patay ang usa ka lalaki samtang kini nagsayaw sulod sa diskohan human gitabangan og pusil sa managsuon nga silingan ra usab sa biktima pasado ala-una sa miaging kaadlawon sa sitio Sumimbang Sur, barangay Bitoon lungsod sa Daanbantayan.

Patay dihadiha dayon ang biktima nga   si Renato Pepito, 35, molupyo sa nahisgutang lugar samtang ang gitumbok nga mamumuno mao ang managsuong sila si Eleiser Gulfan “alyas” Bundoy ug manghod niini nga si Kimby Gulfan, silingan sa biktima.

Sa pasiunang imbestigasyon sa kapolisan sa maong lungsod nagbutyag nga dunay gipahigayong disko ang maong lugar human sa last counting sa mga kandidata, tipik sa ilang umaabot nga kapistahan karung semanaha.

Dugang imbestigasyon sa kapolisan gikan sa mga nakasaksi nga sa wala pa mahitabo ang pagpamusil ang biktima misulod sa diskohan ug nagsayawsayaw uban sa mga higala niini.

Ang managsuong suspek nga gikatahong pulos hubog misulod usab sa diskohan ug miduol sa biktima ug wala magdugay nagkalalis.

Apan sa tantong panaglalis kalit lang mibunot si Eleiser sa dala niining .45 nga kalibre sa armas nga gibutang sa iyang hawak dayong pusil makausa ka higayon ngadto sa biktima ug natumba.

Nagkatibulaag og dinaganay ang mga tawo sulod sa diskohan pagkakitang natumba ang biktima kinsa naigo sa tiyan, gikatahong gitiwasan usab sa manghod nga suspek sa gibitbit niining laing kalibre 45 pistola diha sa kilid sa lawas ang biktima nga nakaingon sa kamatayon niini.

Human sa hitabo daling midagan palayo sa dapit ang mga suspek ug wala na maabti sa mirespondeng kapulisan.

Si PO2 Alfredo Mandal nga nahinabi sa Banat News miingon nga nakakuha sila og duha ka kabhang sa kalibre .45 nga pistol sa crime scene.  – BANAT NEWS