2 'tulisan' nadisarmahan sa ilang biktima 'sikop

CEBU, Philippines - Nasikop sa kapulisan ang duha ka minor de edad human kini nanulis sa usa ka Sangguniang Kabataan tsirman sa barangay Antonio nga si Roberto Malalay kauban ang iyang uyab sakay sa usa ka de pasaheruan sa Bacalso Avenue alas 9:45 sa miaging adlaw.

Ang mga suspetsado nag-edad pa og 16-anyos taga sitio Panagsama, Basak San Nicolas ning dakbayan sa Sugbo ug 17-anyos nga taga sitio Baskio, Basak Pardo, ning dakbayan sa Sugbo kansang mga pangalan gipugngan sa Banat News.

Sa pakighinabi sa Banat News sa biktima mibutyag kini nga samtang nagsakay sila sa de-pasaheruang jeep nga naay rota nga 44A kalit lang mideklarar ang duha og holdup ug nakuha ang iyang cellphone nga C300B diin nagkantidad og P15,300.

Dugang pa sa biktima nakig-inilogay sa armas nga gition diha sa iyang nawong hangtud nga iyaha kining nailog hinungdan nga mitalaw ang mga tulisan ug nanganaog maong iyaha kining gigukod.

Naatlan usab nga adunay nagpatrolyang polis diha sa maong lugar hinungdan nga mao nay misikop sa duha.

Nasakmit sa kapulisan ang usa ka homemade paltik chrome plated .38 revolver nga naay mga marka ug usa ka Indian pana nga adunay upat ka uhas niini. - Shellane Enorasa ug Marjorie Romero (BANAT NEWS)