Gob. Garcia gibisita ni Gob. Marcos

CEBU, Philippines - Gibisita ni IlocosNorte Gob. Imee Marcos si Gob. Gwendolyn Garcia sa Kapitolyo niadtong milabay’ng adlaw sa wala pa kini moadto sa lungsod sa Sibonga aron pagtan-aw sa Bunga Festival.

Si Imee Marcos maoy ikalimang Marcos nga mibisita dinhi sa probinsiya sa Sugbu tungod sa bag-ong kasuod sa paghinigalaay.

Unang nibisita dinhi sa Sugbu sa wala pa ang election mao ang senador karon nga si Sen. Ferdinand ‘Bongbong’ Marcos, gisundan kini ni Irene Marcos Araneta ug niining bag-ohay lang si kanhi first lady ug karon Ilocos Norte Kongresista Imelda Marcos nga mitambong sa pagbukas sa One Cebu Expo didto sa Cebu International Convention Center (CICC) sa dakbayan sa Mandaue niadtong nakalabay’ng semana.

Matud pa ni Capitol consultant on information Rory Jon Sepulveda nga ang kasuod sa panaghigalaay sa mga Garcia ug mga Marcos nadugtong pinaagi sa pagkapili ni 6th district Kongresista Gabriel Luigi Quisumbing kansang inahan igsuon ni Imelda Romualdes Marcos.

Si Sepulveda mipasabot nga bisan pa man sa mga negatibong mga alegasyon nga nahimo sa kanhi administrasyon ni kanhi Presidente Ferdinand Marcos apan ang gobernadora nakigsuod sa mga Marcos tungod kay gilantaw niini nga ang mga kalambuan sa umaabot nga panahon nga sarang kapahimuslan sa mga Sugbuanon.

Wala hinuon kini mitug-an kun unsa ang makuhang kaayohan sa probinsiya gikan sa pagpakigsuod sa gobernadora ngadto sa mga Marcos gawas lamang sa gisaad ni Senador Marcos nga mohatag kini og mga mihuras sa probinsiya sa higayon nga makalingkod na kini sa Senado.

Sayo sa bulan sa Hulyo, una nang mibisita si Garcia sa Ilocos Norte sa pamosong Ilocandia Hotel nga gipanag-iya sa mga Marcos. – BANAT NEWS