CEBU, Philippines - Pagdili pagbutang sa pangalan ug hulagway sa mga politiko sa ilang mga pet projects wala usab mauyuni ni Gob. Gwendolyn Garcia human sa balaudnon nga gipanday ni Sen. Francisco “Chiz” Escudero.
Sumala pa ni Capitol consultant on information Rory Jon Sepulveda nga pareho ang baruganan sa gobernador ug igsuon niining si 3rd district Kongresista Pablo John Garcia kinsa mao usab ang Secretary General sa One Cebu Party.
Gipasabot ni Sepulveda nga ang gobernadora nagtuong katungod sa katawhan nga mahibalo kun diin magagikan ang proyekto.
Giklaro niini nga ang gobernadora wala magpasigarbo ug labaw nang wala mangangkon nga iya ang maong proyekto ug mga programa kay ang kwartang gigamit buhis man sa gobiyerno dili sama sa gihimo sa mga opisyales sa siyudad sa Sugbu nga gibutang ang mga hulagway niini sa mga buses.
Apan iyang giklaro nga ibutang lamang ang pangalan sa gobernsdora ug sa probinsya aron dili binuangan ang mga proyekto sama sa nahitabo sa mga waiting sheds sa daplin sa kadalanan.
Si Sepulveda nagkanayon nga ang mga local nga opisyales sa kalungsuran nakat-on sa pag-amping sa proyekto sa probinsiya tungod kay girespetahan nila ang naghatag niini.
Hinuon gitataw ni Sepulveda angayan nga konsultahon ang tanang mga sector sa dili pa kaaprobahan ang balaudnon ni Escudero.
Iyang gipatin-aw nga mas maayo nga i-regulate lamang ang pagbutang sa mga pangalan sa government officials ug dili gyud hingpit nga i-ban apan andam ang Kapitolyo pagtuman niini kun mahingpit kining balaod. (BANATNEWS)