Tanod gitigbas sa iyang gitiona'g armas

CEBU, Philippines - Naangol ang usa ka hubog nga barangay tanod human siya tigbasa sa iyang silingang mananagat nga gitionan niya og armas de fuego didto sa Sitio Pedregosa, North Poblacion lungsod sa San Fernando niadtong Domingo sa alas 6:00 sa hapon.

Ang biktima mao si Artemio Abatayo, 44, minyo, ug tanod sa nahisgutang barangay, samtang ang suspek mao ra ang iyang silingan nga si Fermin Castillon, 57, minyo nga usa ka mananagat.

Si SPO1 Francisco Salubre sa San Fernando Police Station mibutyag sa Banat News nga naglakaw sa karsada ang suspek kauban ang iyang anak ug asawa dihang naagian niini ang biktima kinsa hubog kaayo ug kalit lang mihiwasa ug nanghasi kanila.

Unya milanit kini sa iyang .357 nga revolver ug gitionan ang suspek apan ang naulahi abtik nga nakaibot sa gitakin niyang sundang ug diha-diha gitigbas niini ang duha ka kamot sa biktima dayung ilog sa iyang armas. Dihang nakimay na ang biktima sayon ra kaayo kining gidis-armahan sa suspetsado ug gihatod dayon ngadto sa buhatan sa kapolisan uban ang iyang kaugalingong sundang nga gigamit niya paghabas sa biktima ug mismo ang iyang kaugalingon.

May upat ka buhing bala ang armas sa tanod nga gituohan sa mga tigpaniid nga kun nakablit pa kadto hayan nga mabiktima ang suspek.

Sa pagkakaron natanggong na sa prisohan ang suspetsado. (BANATNEWS)