3 tinun-an nasudlag espiritu?

CEBU, Philippines - Tulo ka mga tinun-an sa kolehiyo ang gidudahang nasudlan og dautang espiritu sa miaging adlaw sulod sa ilang gipuy-an diha sa Cebu City Condominium nga nahimutang sa dalan N. Bacalso Avenue.

Ang tulo gidala pa ngadto sa psychiatric ward sa Vicente Sotto Memorial Medical Center ug sa Cebu City Medical Center aron ipatan-aw ang kahimtang sa ilang pangisip.

Nasuta nga sagad sa namuyo sa maong condominium mga scholar sa dakbayan nga lumad nga nagpuyo sa mga bukirong barangay sa siyudad ingon man kadtong ubang mga naapektahan sa demolisyon sa siyudad.

Matud pa sa report sa Balitang Bisdak kalit nga nagsunod-sunod og siyagit ang tulo nga murag wala sa ilang kaugalingon hinungdan nga naalarma ang ubang residente sa maong dapit ug nanawag sa barangay.

Gikatahong gawas sa pag-wild gihapak-hapak pa sa maong mga tinun-an ang ilang mga ulo sa bungbong, usa kanila ang gidala sa Cebu City Medical Center.

Pipila ka mga residente sa maong dapit ang nagduda nga basin dunay kalabotan ang pagputol sa pipila ka mga dagkong kahoy sa maong dapit sa milabay’ng mga katuigan dihang gihimo ang maong building. (BANATNEWS)