200 balay naugdaw sa T. Padilla

CEBU, Philippines - Gibana-banang kapin 200 ka panimalay ang naugdaw sa nahitabong sunog kagahapon nga miigo sa lima ka sitio sa barangay T. Padilla pasado alas dose sa udto kagahapon.

Ang lima ka sitio mao ang sitio Sto. Niño, sitio Freedom, sitio Purisima Concepcion, sitio Bahaw ug sitio Puso kansang kabalayan nagdasok ug kadaghanan ginama sa light materials. 

Atol ning pagsulat sa balita wala pa matino sa kabomberuhan ang kantidad sa danyos apan gibana-banang kapin sa usa ka libo ka pamilya ang nawad-an og pinuy-anan sa maong sunog.

Ang maong sunog giisa ngadto sa Task Force Bravo hinungdan sa pagresponde sa kadaghanan sa firefighting units sa tibuok Metro Cebu ug mga kasikbit nga kalungsoran lakip na sa Armed Forces of the Philippines. Gibana-banang mokabat sa kapin 200 ka panimalay ang nasunog ug gani ang CPILS Building nalakip sa sunog ang ilang kusina nga bahin ug ang engineering department niini.

Base sa pamahayag ni Merla Lavides, molupyo sa maong lugar ug usa ka volunteer sa barangay nga sa panimalay ni Rosemarie Rizon nga trabahante sa City Hall nagsugod ang kalayo apan wala pa kini makumpirmar atol ning pagsulat sa kabomberuhan.

Sumala pa ni Lavides nga adunay tulo ka andana ang panimalay ni Rizon ug aduna usab kini mga nag-abang, giingong sa ikatulong andana magsugod ang kalayo tungod kay adunay nagluto nga migamit og goma sa paghaling.

Apan si Rizon dihang gikahinabi sa mga tigbalita diha sa dalan T. Padilla diin kini mipahimutang kusganong mihimakak nga aduna siya’y gipaabang sa maong balay.

Sumala pa niini nga siya ug tulo ka anak apil na ang special child mao ray nagpuyo sa ilang panimalay sa pagkakaron apan kaniadto adunay nag-abang sa likod nga bahin sa iyang balay apan gipapahawa na ug kasamtangan kini karun nga gipuy-an sa iyang pag-umangkon.

Samtang ang panimalay nga diin giingong nagagikan ang sunog gipuy-an kini sa iyang apo ug mga anak apan mihimakak nga diha magsugod kanila ang sunog. Samtang si SFO3 Roelyn Maratas mibutyag sa mga tigbalita nga adunay duha ka tawo nga nasamdan atol sa maong sunog nga mao sila si Lani Forentino, nasamdan kini sa iyang kamot human mabuak ang gisudlan sa usa ka santos nga iyang gidala ug Charlone Peleño, 23, nga naigo sa hose sa bombero nga giilogan sa mga residente.

Butyag pa ni Maratas nga usa sa ilang nasugatan nga problema mao ang kahagip-ot sa dalan gumikan kay di makasulod ang ilang mga dagkong firetrucks ug ang kakulang sa pressure sa tubig sa mga fire hydrants.

Nasaksihan sa Banat News ang pipila ka mga linya sa tubig ang gituyo pagguba sa mga residente lakip na niini ang diha sa sudlonong eskina sa dalan T. Padilla sa tinguhang makakuha og tubig nga isablig sa ilang mga balay.

Ang maong pagpangguba sa mga tubo gidili sa kabomberuhan gumikan kay kini maoy makaingon sa paghinay sa pressure sa tubig sa mga fire hydrants nga naa sa duol sa fire scene maong mapugos silang adto mosuyop og tubig sa mas layong source.

Kini maoy hinungdan nga mosamot og kalangay ang ilang pagpawong sa kalayo.  (BANATNEWS)