Barko missing

CEBU, Philippines - Usa ka cargo vessel gikan sa Manila nga paingon dinhi sa Sugbo padayon pang gipangita sa mga sakop sa Philippine Coast Guard human kini kalit nawala ug wala na gyud makontak sa radyo pipila ka gutlo sukad migikan kini sa kauluhan niadtong miaging adlaw.

Usa ka cargo vessel gikan sa Manila nga paingon dinhi sa Sugbo padayon pang gipangita sa mga sakop sa Philippine Coast Guard human kini kalit nawala ug wala na gyud makontak sa radyo pipila ka gutlo sukad migikan kini sa kauluhan niadtong miaging adlaw.

Ang MV SF Freighter adunay karga nga mga steel bar ug aduna kini upat ka opisyal ug 12 ka mga tripulante.

Nasayran nga ang maong barko paingon unta sa siyudad sa Sugbo aron ihatod ang ilang mga dala nga mga steel bar.

Apan sa dihang naabot sila sa Dos Hermanas Island sa Marinduque giingong gitagbo sila sa dagko kaayong mga balod ug sa kalit lang wala na mi-andar ang ilang makina.

Apan gawas sa makina nga nahunong, ang radio signal sa maong cargo vessel nahanaw usab ug dili na makontak sa ulohang buhatan niini sa Bacolod. Ang nanag-iya sa barko mao ang Sea Food Shipping nga gipanag-iya sa usa ka Henden Chua sa Bacolod.

Hangtod karong adlawa, padayon pa ang pagpangita sa maong barko.

Gani ang Philippine Coast Guard, nanawagan na sa tanang mangingisda ug nakapanag-iya og mga barko sa pagtabang og pangita sa barko nga nawala aron usab ilang ma-rescue ang mga sakay niini.

Samtang midispatsar usab og mga aircraft ang Philippine Coast Guard aron usab makatabang sa pagpangita kun asa ang maong barko.

Si Seaman 1st Class Julius Banzuela sa Philippine Coast Guard Manila Station mibutyag nga walay hunong ang pagpangita nila sa nawala nga barko ug gani daghan na kaayo sila og gipangayoan og tabang aron makit-an ang barko.

Matud pa ni Seaman 1st Class Banzuela nga adunay usa ka crew nga Sugboanon base usab sa ilang nakuha nga impormasyon apan ila pa kining sutaon.

Samtang sa laing bahin, natabang usab ang usa ka cargo vessel nga MT SP Beijing nga nagtimbang og 4,599 gross tonnage nga may sakay nga 18 ka mga tripulante.

Nasayran nga ang maong cargo vessel nakasinati usab og pagkadaot sa makina tunga-tunga sa kadagatan sa Cabra Island,Occidental Mindoro, apan maayo nalang kay nakapangayo og pakitabang sa Philippine Coast Guard pinaagi sa pagpadala og dinaliang radio message.

Ang Philippine Coast Guard miguyod sa MT SP Beijing gamit ang tugboat ug nakaabot kini sa Bacolod pasado alas 11 na sa miaging gabii. (BANATNEWS)