CEBU, Philippines - Gibasol ni kanhi senador John Henry ‘Sonny’ Osmeña ang mga lokal ug national officials sa Liberal Party nga gipangulohan ni Presidente Benigno ‘Noynoy’ Aquino III tungod sa pagkaparot sa kandidato sa LP sa pagkapresidente sa Philippine Councilors League kon PCL sa lalawigan sa Sugbu kagahapong adlawa.
Matud pa ni Osmeña sa interbyu sa DyRF mas bentaha unta karon ang LP sanglit nahimo na man kining administration party nunot sa pagkadaug ni Aquino busa angayan gyud unta nga ang LP maoy midominar sa maong eleksyon ug dili ang mga kaatbang.
Giasoy ni Osmeña nga dili na bag-o alang kaniya ang gika-report nga pagpanghatag og P5 mil ngadto sa matag usa sa mga konsehal nga mobotar sa kandidato sa One Cebu Party hinungdan nga midaog sila Ivy Durano Meca ug Eduardo ‘Digul’ Gullas III sa pagkapresidente ug pagkabise presidente sa PCL.
Kini tungod kay naandan na kini nga modus operandi sa kampo sa administrasyon ilabi na sa pamunuan sa gobernadora sa lalawigan sa Sugbu. Apan gitataw ni Osmeña nga ang iyang gikatingad-an mao nga ang LP national officials wala gyuy natabang bisan gamay na lamang sa mga kandidato sa LP sa election sa PCL niadtong nakalabay nga adlaw.
Apil sa gisaway sa kanhi senador mao si Bise Gob. Gregorio Sanchez kay nagpatugatuga og padagan og kandidato apan dili makadaug.
Tungod niini si Osmeña nakasaway nga gisusama lang nga gipahimuslan ang mga lokal nga suporter ni Aquino sa miaging piniliay aron masiguro ang ilang kadaugan sa national elections. – BANAT NEWS