'Sex Slave' sa 2 ka tuig

CEBU, Philippines - Usa ka menor de edad ang nasalbar sa mga awtoridad gikan sa kapin duha ka tuig nga pagkahimong ‘sex slave’ sa usa ka trabahante sa Department of Public Works and Highways (DPWH).

Ang biktima nagpangidaron og 14-anyos ug kasamtangan nga nagpuyo sa Marigondon syudad sa Lapu-lapu naluwas sa mga polis gikan sa mga kamot sa 44-anyos nga suspek (pangalan gipugngan sa Banat News) nga iyaha rang bayaw nga molupyo sa usa sa mga sitio sa barangay Apas ning dakbayan ug nagtrabaho sa DPWH isip Mechanic 1.

Sa pakighinabi sa Banat News ni PO3 Geoffrey Gutual kini misaysay nga taga Masbate ang maong bata ug 12-anyos pa kini mibalhin ug dinhi na magpuyo sa iyang igsuong babaye   diha sa barangay Apas.

Sumala pa nga usa ka semana palang kining nakapuyo sa balay sa iyang igsuon giingong gilugos na siya dayon sa suspek dungan sa bahad nga kun motug-an kini sa kapolisan wala nay mobuhi sa iyang magulang ug mga pag-umangkon.

Tungod sa panghadlok sa suspek ngadto sa biktima nagpakahilom nalang kini ug bisan na gani ang iyang magulang nga kapuyo sa suspetsado wala niya tug-ani.

Sukad niadto gikatahong nausban pa makadaghang higayon ang pagpanglugos sa suspek ngadto sa dalagita ug gihimo nalang kining pahuwasanan sa lawasnong kauhaw sa suspek.

Hinuon gikatahong dihay usa ka higayon nga nasakpan sa maguwang nga kapuyo sa suspek ang gihimo niini ngadto sa dalagita apan wala kini ipadakop ug gipabalhin lang og puyo ang biktima ngadto sa iyang iyaan sa dakbayan sa Lapulapu.

Apan niadtong sugod sa klase buwan sa Hunyo nakugang ang biktima nga kalit lang nga mipatim-aw ang suspetsado sa ilang tunghaan ug gikuha siya niini ug gidala sa usa ka lugar diin giusab ang pagpanglugos.

Hangtud nga niadtong Lunes lang naaktuhan ang biktima ug ang suspetsado sa asawa ni PO3 Gutual nga kauban sa iyaan sa biktima nga nagsakay sa usa ka motorsiklo.

Tungod sa dakong pagduda nianang pagkagabii gisukit-sukit sa iyaan sa biktima kun unsa gyud ang ilang relasyon sa suspetsado ug diha na mitug-an ang dalagita nga duha ka tuig na siyang gihimong pahuwasanan sa suspek.

Tungod niini daling midangop sa panimalay ni PO3 Gutual ang iyaan sa biktima ug inabagan sa Women’s Desk Section sa Cebu City Police Office aron magpatabang.

Dihang gisusi sa kapolisan ang balay sa suspek wala na kini mouli ug duha na ka adlaw usab kining wala motrabaho, nagduda ang kapolisan posibleng nakabantay na kini ug nagtago-tago.

Base sa balaod bisan pa og mangangkon ang usa ka menor de edad nga iyang kabubut-on ang nahitabo kanila sa usa ka hamtong dili kini dawaton sa korte gumikan kay maisip gihapon kining giabusohan ug gipahimuslan ang kabatan-on sa biktima. – BANAT NEWS