CEBU, Philippines - Usa ka 16-anyos nga bilanggo sa Talisay City Jail nakapuga sa milabay’ng semana ug padayon pang gipangita karon sa mga awtoridad.
Ang nakapuga naila sa angga nga “Young Master” (tinuod nga pangalan gipugngan) kansang ulahing nahibaw-ang pinuy-anan nahimutang diha sa Deca Homes, Tungkil Minglanilla.
Apan natawo kini ngadto sa Pasig City Manila ug giingong usa ka Tagalog speaking ug nabilanggo tungod sa kasong akyat-bahay. Sumala pa adunay ‘patong’ sa ulo nga P13,000 alang sa iyang pagkasikop.
Si Chief Inspector Renante Rubio, officer in charge sa Talisay City Jail sa pakighinabi niini sa Banat News kagahapon nagkanayon nga duha ka semana na nilang gipangita ang suspek. Matud ni Rubio nga ang mga menor de edad nga bilanggo gilain og cottage lakip na niini ang mieskapo.
Gibutyag ni Rubio nga giatol sa suspek nga gabii ug kusog ang uwan sa pagpuga niini pinaagi sa pagputol sa steel bar nga matting diha sa kisame ug gikan sa atop mikatkat ngadto sa 3rd gate ug milayat ngadto sa likod nga bahin sa bilanggoan.
Ang Talisay City Jail nahimutang kini diha sa barangay Maghaway usa sa mga bukirang barangay sa dakbayan Talisay ug nalibutan kini og habog nga paril nga may mga barbed wires. – BANAT NEWS