'Lookout' sa pag-ambush sa ex-mayor sa Compostela nadakpan

CEBU, Philippines - Nasikop sa kapulisan ang kanhi drayber sa ambulansya sa lungsod sa Compostela nga gitumbok nga maoy ‘lookout” sa pag-ambush patay sa kanhi mayor sa lungsod sa Compostela nga si Joselito “Kokoy” Reynes niadtong Lunes sa gabii.

Si Dominador Viloria, 54, ug anak niini nga si Dominador Jr, 23, taga barangay Mulao, Compostela nasikop kagahapon sa kaadlawon sa mga sakop sa Special Investigation Task Team nga gipangulohan ni Chief Insp. Romeo Santander, hepe sa Regional Special Operations Group (RSOG).

Si Viloria Sr. nakuhaan og .357 revolver nga dunay upat ka buhing bala, samtang nakuhaan usab sa posisyon ang anak nga si Viloria Jr. og usa ka kalibre .45 nga armas ug lima ka buhing bala sulod sa magazine niini.

Si Santander nga nahinabi sa mga tigbalita mipasabot nga dili tuyo nilang rondahon ang balay sa amahan ug anak kundili ila pa untang ipailawom sa surveillance aron ilang aplayan og search warrant tungod sa nadawat nilang report nga miyembro sa gun for hire si Viloria.

Apan base sa nakuhang impormasyon gikan sa lima, sa unom ka mga testigos ilang gitumbok si Viloria Sr. nga maoy lookout sa wala pa mahitabo ang ambush.

Si Santander misaysay nga sa ilang pag-abot sa dapit ilang nakit-an si Viloria Sr. gawas sa ilang balay nga nagbarog-barug nga may gisukbit nga armas apan nakamatikod kini ug daling misulod ug nanirado.

Matud ni Santander tungod sa ilang nakitang armas ilaha dayong giadto ang balay ug gituktok apan wala gyud sila ablihi hinungdan nga napugos sila sa pagguba sa pultahan.

Mipasangil si Santander nga nagtion nang daan og pusil si Viloria Sr. tumong kanila hinungdan ilaha kining gidumog hangtud milampos nga nadisarmahan sa iyang .357 revolver.

Sumala pang Santander ang panaglayog nila nahitabo atubangan sa 9-anyos nga anak nga lalaki sa suspek. Ang anak nga si Viloria Jr., nga didto sa luyo nga labihang huboga giapil pagsikop human makuhai og .45 nga kalibre sa armas.

Kasong illegal possession of firearms and ammunitions ang ilang ipasaka sa duha apan ilakip nila sa pagpasaka sa kaso si Viloria Sr. sa pag-ambush kang Reynes isip accessory sa krimen.

Ang abogado ni Viloria nga si Atty. Rex Fernandez nga nahinabi sa mga tigbalita miingon nga mosang-at sila og writ of habeas corpus sa korte aron mabuhian ang iyang kliyente.

Kini tungod kay iyang gihulagway nga illegal ang pagdakop sa kapulisan sa iyang kliyente kay walay search warrant ug planted lang ang tanang ebidensyang gipasangil.

Mibahad si Fernandez nga mosumbalik og pasaka og kasong kriminal ngadto sa kapulisan nga domicile, arbitrary illegal detention ug child abuse ug torture gumikan sa pag blindfold nila sa 9-anyos nga bata.

Si Viloria nahimong drayber sa ambulansya sa lungsod sa Compostela niadtong bulan sa Agosto sa miaging tuig apan human mapilde si Ritchie Wagas mihunong na siya pagtrabaho.

Si Viloria Sr. sa dihang gikuhaan sa iyang habig hugtanong mihimakak sa tanang pasangil batok kaniya ug iyang anak ug wala gyud siyay kalibotan sa maong hitabo.

Siya miingon nga atol nga gi-ambush patay si Reynes niadtong Lunes didto siya kilid sa munisipyo nagtan-aw og salida sa telibisyon ug kauban pa sa iyang tupad ang usa ka pulis nga ginganlan niya og Roy uban sa laing mga tawo.  – BANAT NEWS