CEBU, Philippines - Mga records sa Traffic Commission (TRAFCOM) sa dakbayan sa Talisay nangapapas gikan sa computer sa wala pa masayring hinungdan apan adunay mga pagdudang gituyo kini aron dili ma-evaluate ang mga performance sa traffic enforcers.
Si Konsehal Celiapo Cabuenas kinsa miyembro sa komitiba sa TRAFCOM nga nahinabi sa Banat News kagahapon nagkanayon nga niadtong Biyernes ug Sabado sa gipahigayong tigom gibutyag ni Bise Mayor Alan Bucao kinsa maoy presidente sa TRAFCOM ang maong insidente.
Matud ni Cabuenas nga ang gidudahang mibuhat niini mao ang kanhi job order nga maoy naghupot (ngan gipugngan hangtud walay pormal nga gihimong imbestigasyon) sa mga records sa mga traffic enforcers sa ilang daily performance.
Ang maong kawani wala na mo-report og balik sa trabaho sukad nga milingkod ang bag-ong administrasyon niadtong Hunyo.
Matag buwan dunay performance report sa mga enforcer aron masuta kinsay kugihan ug badlongong enforcer apan karon maglisod na sila sa pagsubay sa evaluation performance tungod sa nangapapas nga records.
Gikataho usab nga dunay mga enforcer nga wala makapasar sa eksaminasyon apan nakatrabaho, samtang adunay sad mga nakapasar apan mao na hinuon ang wala makatrabaho.
Gipasabot ni Cabuenas nga dunay nakapasar apan dili na kwalipikado sama sa edad niini tungod kay lapas na sa 50-anyos ug duna say mugbo og barog.
Gibutyag ni Cabuenas nga dunay miduol kaniyang mga enforcer ug misumbong kini batok sa maong kawani nga giingnan silang dili na lang sila patrabahuon og tarong kay pang-ilisan na sila.
Ang Banat News mitawag kang Bucao aron makuhaan kini og pamahayag kabahin sa maong problema apan dili kini motubag sa tawag. – BANAT NEWS