Pugante sa Lapulapu City Jail napusilan, nadakpan

CEBU, Philippines - Napusilan ug nasikop pagbalik ang usa ka binilanggo nga nakaeskapo sa Lapulapu City Jail atol sa operasyon diha sa sitio Ibabao, barangay Agus dakbayan sa Lapulapu kagahapon sa buntag.

Matud pa ni Bureau of Jail Management and Penology- 7 Regional Director Chief Supt. Norvel Mingoa mga alas 9:00 kagahapon sa buntag nasikop si Ronald Amistad alyas Unat, 27.

Si Amistad miuli sa ilang panimalay sa barangay Agus apan natiktikan kini sa BJMP hinungdan nga giadto kini nila ni Senior Jail Office, One Constancio Pantollano.

Apan human makit-i ni Amistad ang BJMP dali kining midagan hinungdan nga kini gipusil sa tiil ug dihang naigo naapsan kini ug gidala sa tambalanan. Si Amistad gibalik na sa karsel human masutang dili peligroso ang samad pinusilan niini.

Kahinumduman nga si Amistad uban sa iyang kaubang binilango nga si Alfe Lopez mieskapo sa milabay’ng Hunyo 26 ning tuiga sa gabii agi sa usa ka damba nga gigamit sa pagpamintal aron makagawas sa Lapulapu City Jail. Si Lopez nasikop pagbalik sa mga sakop sa BJMP samtang si Amistad nagtagotago kini hangtod sa pagkasikop niini kagahapon. Ang pag-eskapo miresulta sa pagka-relibo kang LCJ Warden Supt. Isabelo Cartin Jr. ug gipulihan ni Supt. Simeon Dolojo.

Si Amistad adunay kasong illegal possession of firearms ug kalapasan sa Comelec gun ban. – BANAT NEWS