CEBU, Philippines - Supak si Lahug barangay kapitan Mary Ann Delos Santos sa laraw ni Cebu City North District Kongresista Rachelle Margaret Del Mar nga motukod na usab og laing flyover sa amihanang bahin sa siyudad sa Sugbu aron masulbad ang problema gihapon sa trapiko.
Matud pa sa kapitan nga sakto na ang gidaghanon sa mga flyovers sa North District nga gipatukod sa amahan sa kongresista nga si kanhi Raul Del Mar.
Si Delos Santos sa interbyu sa DyRF miingon nga dili angayan nga pun-an pa ang flyovers tungod kay nagtuo siyang dili kini ang tinuod nga kasulbaran sa naglapad nga problema sa trapiko.
Nagduda hinuon si Delos Santos nga adunay laing katuyoan si Del Mar sa pagpatukod og flyover ug dili ang solusyon sa problema sa trapiko.
Mitambag si Delos Santos ngadto kang Del Mar nga iliko ang punting niini sa mga proyekto ngadto sa angayan nga tabangang mga mulupyo sa bukirang bahin sa north district nga nakalimtan na sa kalamboan ingon man ang panglawas ug edukasyon. – BANAT NEWS