'Killer' sa ex-mayor nailhan kasohan

CEBU, Philippines - Nailhan na ug gikatakdang pasakaan og kaso kagahapon sa hapon sa kapolisan sa probinsya ang ‘killers’ sa kanhi mayor sa lungsod sa Compostela nga si Joselito “Kokoy” Reynes nga gibanhigan niadtong Lunes sa gabii didto sa barangay Estaca lungsod sa Compostela.

Si Sr. Supt. Erson Digal, hepe sa kapolisan sa lalawigan nagkanayon nga ilang pasakaan og kasong murder ang usa ka drayber (pangalan gipugngan una sa Banat News) nga kanhi sakop sa kanhi mayor ug wala na mopakita sukad sa hitabo.

Matud pa ni Digal nga sa unom ka mga saksi nga ilang giimbitar nga gipaubos sa interogasyon sa mga sakop sa Special Investigation Task Team lima ang positibong mitumbok sa maong suspek nga maoy killer sa kanhi mayor.

“Katong ato gi-invite yesterday (Miyerkules pa) for questioning, nisulti sila mao nay nahitabo ug nisulti sila nga mao gyud ang suspek, ni crop-up na ang pangalan, so, atong gipa-subscribed ilang affidavit aron ma-file nato ang kaso, maybe this afternoon (kagahapon),” matud pang Digal.

Apan matud ni Digal ang ikaunom sa ilang giimbitar nga si Reypas Gahi miboluntaryong mopaubos sa paraffin test aron paglimpiyo sa iyang pangalan nga wala siya’y kalambigitan sa kaso sanglit ang iyang asawa paryente sa gipatay nga kanhi mayor.

Matud ni Digal ilang puntariya mao ang pagsikop sa killer aron mao nay makatug-an si kinsa ang pangalan sa drayber sa kolor pulang motorsiklo nga maoy gigamit atol sa pagbanhig.

Si Digal miingon nga iya pang gipa-background check ang mga suspek hinungdan nga dili pa nila masulti kun politika o personal ba ang motibo sa krimen.

Samtang si Compostela mayor-elect Joel Quiño subling mibisita sa buhatan ni Digal kagahapon sa buntag. Ang mayor nga nahinabi sa mga tigbalita mipadayag nga dako ilang kalipay ug sa pamilya sa gipatay nga iyang campaign manager nga duna nay development sa kaso.

Si Quiño mipahibawo nga nakadawat siya og hulga gikan sa wala nagpailang tawo nga gipaagi sa text nga siya maoy isunod, usa ka adlaw human gipatay si Reynes.

Ang maong text, nagkanayon, “Daghan pang adlaw…ug dili mo mangundang anang inyong pagkatikasan..Usa nahipos na…kaw sunod,” matud pa niini. – BANAT NEWS