CEBU, Philippines - Ang sinagop ni Mayor Socrates Fernandez nga si Joavan Fernandez nalingaw na sa pag-atiman karon sa mga batang libud-suroy sa kadalanan sa Talisay busa wala na kini magpabadlong.
Kagahapon sa hapon gipahigayon ang husay tali kang Joavan ug sa registered nurse nga si Vincent Castrodes didto sa mediation center sa Palace of Justice sa siyudad apan ang duha wala gyud mahusay sa mediator nga si Harry Timtim.
Kahinumdoman nga niadtong buwan sa Hunyo niining tuiga si Joavan gipasanginlan ni Castrodes nga mition kaniya og pistola dihang nagkaengkwentro sila sa trapiko sa barangay Bulacao, Talisay. Gumikan sa maong hitabo gipasakaan ni Castrodes si Joavan og kasong grave threat unya gisuwayan unta sila sa paghusay kagahapon.
Si Castrodes nga nahinabi sa Banat News nagkanayon nga wala sila mahusay si Joavan didto sa mediation center samtang ang naulahi wala usab mangayo og pasaylo ngadto kang Castrodes.
Matud ni Castrodes nga dili usab siya gustong makighusay kang Joavan tungod kay buot niyang ikasang-at ngadto sa korte ang kaso aron patagmon ang sinagop sa mayor.
Ang Banat News mitawag kang Joavan aron makuhaan kini sa iyang habig kabahin sa maong husay nila ni Castrodes apan dili kini ma-contact tungod kay busy ang iyang telepono.
Sayo niini mipasangil si Castrodes nga ang Isuzu Big Horn ni Joavan nga nagtangag sa plakang YEZ-460 gipaubos sa kustodiya sa mga polis, ug dihang gipahigayon sa kapolisan ang pagsiksik sa sulod sa maong sakyanan nasuta sa mga otoridad nga may karga kining usa ka kalibre .45 nga pistola, 13 ka mga buhing bala, duha ka magazine sa nahisgutang armas, usa ka magazine pouch nga kolor itom ug usa ka holster sa kalibre .45 nga kolor itom usab ang na-recover sa mga polis. (BANAT NEWS)