Ombudsman di moimbestigar ni Sanson

CEBU, Philippines - Gitumbok ni Assistant Ombudsman Virginia Palanca Santiago nga ang ilang buhatan dili una mopahigayon og imbestigasyon batok sa usa ka opisyal sa LTFRB-7 kinsa nakadasmag og taxi gumikan sa kalasbag sa bino sa miaging gabii.

Matud pa ni Santiago sa interview sa DyRF nga posibleng walay imbestigasyon nga ilang buhaton batok kang LTFRB-7 Transportation Development Officer Jose Douglas Sanson kinsa gikatahong hubog nga mibangga sa iyang SUV vehicle ngadto sa usa ka CTC taxi.

Miingon siya nga mahimong maanugon lamang ang paningkamot sa ilang buhatan ug ma-dismiss lamang ang kaso tungod kay dili interesado sa pagsumbong ang drayber sa taxi nga nabanggaan ni Sanson.

Si Santiago miawhag sa publiko nga bisan sila kabus dili gyud unta angayan nga mahadlok sa pagtug-an sa hukmanan sa mga opisyales sa gobiyerno nga abusador.

Naglaum hinuon si Santiago nga ang labaw’ng opisyal ni Sanson nga si LTFRB-7 Regional Director Benjamin Go mohimo og lakang aron madisiplina ang iyang mga sakop. (Chester Abadilla) (BANAT NEWS)