Rama mihangop kang Yeung

CEBU, Philippines - Gipadayag kagahapon ni Mayor Michael Rama sa dakbayan sa Sugbo nga mohangop gyud siya sa mga tawo nga buot motabang sa pagpatahum sa siyudad sa Sugbo busa wala niya panumbalinga ang political background ni Mariquita Salimbangon-Yeung nga maoy mangulo sa Super Beautification Council sa siyudad.

Kini tungod kay giingong suod kaayo si Yeung sa mga pamilyang Garcia sa lalawigan kinsa nahimong higpit nga kaaway sa Dakbayan sa Sugbo.

Apan bisan pa niini, gipasalig sa mayor nga dili kini masagulan og kolor politika sanglit taga Bogo si Yeung ug kinasing-kasing lang ang pagtabang niini sa siyudad sa pagpatahum sa dakbayan sa Sugbo.

“Kung duna gani motabang sa atong lugar ato gyud nang i-welcome, kay diha nato makita nga hangtud karon, buhi gihapon ang spirit sa bayanihan ug boluntarismo,” saysay pa sa mayor.

Sa pagka-karon, mihangyo si Rama sa mga negosyante nga nahimutang sa downtown nga pintalan usab ang ilang mga establisamento aron nindot tan-awon ang dakbayan ug hangpon usab kini sa mga turista.

Partikular nga gibutyag ni Rama ang mga building nga nahimutang sa Carbon, Magallanes, Manalili ug paingon na ngadto sa Colon .

Sa samang higayon giawhag usab niya sa mga negosyante nga   limpiyohan nila kanunay ang ilang mga palibot.

Samtang nagplano usab karon ang kagamhanan sa siyudad nga mangapod -apod og dugang pa nga mga basurahan sa sidewalk aron dili na unya magpataka og labay ang mga tawo sa ilang mga sagbot ug usa kini sa giisip nga paagi sa mayor nga hapsay ug limpyo na unya ang mga nag-unang kadalanan sa dakbayan.   - BANAT NEWS