Usbaw sa suweldo segurado - RTWPB

CEBU, Philippines - Segurado na nga adunay mapaabot nga usbaw sa suholan ang mga mamumuo dinhi sa Central Visayas human ipahibalo sa Regional Tripartite Wages and Productivity Board (RTWPB) nga ilaha nang ipublikar ang ilang desisyon karung Martes sa sunod semana.

Matud ni RTWPB chairman ug kasamtangang director sa Department of Labor and Employment (DOLE-7) Elias Cayanong dihang nahinabi sa Banat News nakadawat na sila sa wage order.

Sa pagkakarun ang gipanday nila mao nalang ang guidelines kun pila ang usbaw sa suholan alang sa mamumuo sa Bohol, Negros ug dinhi sa Sugbo. Nagdumili hinuon pagtug-an si Cayanong kun pila ang posibleng usbaw sa suholan nga mahatag ug bugtong gi-klaro niini nga mas dako ang mahatag karong usbaw sa mga mamumuo sa Sugbo kun itandi sa Bohol ug Negros.

Gipasabot hinuon ni Cayanong ang mga mamumuo nga dili matuman ang gipangayo nga usbaw tungod usab sa daghang konsiderasyon sama sa pag-iyaid sa mga negosyante tungod sa kalisod sa ekonomiya karun.

Ang Alliance of Progressive Labor (APL) maoy miduso og petisyon alang sa P128 nga across the board wage increase samtang ang ALU-TUCP miduso usab og P100 nga dugang usbaw sa suholan. Si Cayanong midugang pagpasabot nga makatarunganon ang nakab-ot nilang desisyon pagpatuman og usbaw sa suholan taliwala sa kalisod karun sa panahon taliwala usab sa nagsaka nga palaliton.   - BANAT NEWS