'Kawatan' gipatay sa Dita

CEBU, Philippines - Usa ka gidudahang kawatan gipusil patay samtang nagsakay og habal-habal sa miaging udto diha sa sitio Dita, barangay Pulangbato ning siyudad.

Ang biktima giilang si Noli Pasaol, kargador ug nagpuyo sa Purok 3 barangay San Jose sa barangay sa Pulangbato nakahiagom og tulo ka samad pinusilan sa luyo sa ulo, ubos nga bahin sa walang siko, ug ubos sab sa walang mata nga maoy gituohang nakaingon sa iyang hinanaling kamatayon.

Mga sakop sa Crime Investigation Unit (CSU) ug Homicide Section sa Cebu City Police Office (CCPO) gipangulohan ni SPO4 Alex Dacua ug mga kaubanan nakakuha og duha ka kabhang sa kalibre .45 nga armas diha sa crime scene nga gituuhang maoy gigamit pagpusil sa suspek ngadto sa biktima.

Matud ni PO2 Judan Batucan nga nahinabi sa Banat News ang biktima nagpahatud sa iyang silingang drayber sa habal-habal nga si Benjie Cogtas paingon sa Pulangbato.

Apan pag-abot sa sitio Dita kalit nga mibutho sa ilang luyo ang duha ka tawong luwan og motorsiklo ug dihang nakapaduol kalit gipusil ang biktima sa angkas niini makadaghang higayon.

Matud ni Manatad miaksyon unta og dagan ang drayber sa habal-habal palayo sa lugar apan giingnan kini sa mamumuno nga ayaw nalang og dagan kay wala kini labot ug ang biktima lamang ilang tuyo.

Gihulagway ang suspek nga nagsul-ob og stripes nga green t-shirt ug nag maong pants kinsa daling misibat palayo sa lugar human sa maong hitabo.

Si Manatad miingon nga nakadungog sila og pasangil sa dapit nga mihulagway sa biktima nga labihang badlungona kay mosaka kini sa kabalayan ug mangawat bisan udtong tutok.

Nagtuo ang kapolisan nga dunay nangasuko sa biktima tungod sa pasangil nga kiriwan kini og kamot.  - BANAT NEWS